சென்னை மாநகரத்தில் பல வழித்தடங்களில் மெட்ரோ தொடர் வண்டிகள் இயக்கப்பட்டு வருகின்றன. தற்போது கரோனா தொற்று காரணமாக தற்காலிகமாக மெட்ரோ தொடர்வண்டி சேவை நிறுத்தி வைக்கப்பட்டுள்ளது. இந்நிலையில், வண்ணாரப்பேட்டையில் இருந்து திருவொற்றியூரை அடுத்த விம்கோ நகரை இணைக்கும் 9 கிலோ மீட்டர் தூர மெட்ரோ தொடர்வண்டியின் இரண்டாம் கட்டப்பணிகள், 3,770 கோடி ரூபாய் மதிப்பீட்டில் நீண்ட நாட்களாக நடைபெற்று வருகின்றது.
இந்தாண்டு மத்தியில் இந்தப் பணிகள் நிறைவு பெறும் என எதிர்பார்க்கப்பட்டது. ஆனால், கரோனா தொற்று முன்னெச்சரிக்கையாக பணிகள் நிறுத்தி வைக்கப்பட்டுள்ளன. தற்போது படிப்படியாக ஊரடங்கு விதிகள் தளர்த்தப்பட்டுள்ளதால், கடந்த மாதம் முதல் மெட்ரோ தொடர்வண்டி விரிவாக்கப் பணிகள் மீண்டும் தொடங்கியது.
இப்பணிகளில் ஈடுபட்டு வந்த வட மாநிலத் தொழிலாளர்கள் பலர் தங்களது சொந்த ஊர்களுக்கு சென்றதால், 50 விழுக்காடு பணியாளர்களுடன் பணிகள் முழுவீச்சில் நடைபெற்று வருவதாக அதிகாரிகள் கூறுகின்றனர். சுரங்கப்பாதைகள், தண்டவாளங்கள் தொடர்வண்டி நிலையம் அமைப்பது உள்ளிட்டப் பணிகள் இறுதி கட்டத்தை எட்டியுள்ளதாகவும் கூறப்படுகிறது.
எனவே, வண்ணாரப்பேட்டை முதல் விம்கோ நகர் வரையிலான மெட்ரோ தொடர்வண்டி பணிகள் வரும் டிசம்பர் மாதத்தில் நிறைவடைந்து, பின் ஆய்வு செய்யப்பட்டு பொது மக்கள் பயன்பாட்டுக்கு வரும் என்று எதிர்பார்க்கப்படுகிறது.
இதையும் படிங்க: பாரம்பரிய கலைகள் மூலம் கரோனா விழிப்புணர்வு!
