தமிழ்நாடு முதலமைச்சர் எடப்பாடி பழனிசாமி வரும் 28ஆம் தேதி சர்வதேச அளவில் முதலீடுகளை ஈர்க்க அமெரிக்கா, இங்கிலாந்து நாடுகளுக்கு பயணம் மேற்கொள்கிறார். இந்தப் பயணம் முடிவடைந்து மீண்டும் செப்டம்பர் 9ஆம் தேதி தமிழ்நாடு திரும்பும் வகையில் திட்டமிடப்பட்டுள்ளது. 14 நாள்கள் பயணம் மேற்கொள்ளும் முதலமைச்சருடன் அமைச்சர்கள் ஆர்.பி. உதயகுமார், எம்.சி. சம்பத், உடுமலை ராதாகிருஷ்ணன், விஜய பாஸ்கர் உள்ளிட்ட 21 பேர் உடன் பயணம் செய்யவுள்ளனர்.
பால் பொருட்கள்-கால்நடை, தொழில் ஆகிய துறைகளில் புதிய முதலீடுகளை ஈர்க்கவும் திட்டமிடப்பட்டுள்ளது. முதலமைச்சர் வெளிநாடு செல்வதால் அரசு நிர்வாகத்தை கவனிக்க பொறுப்பு முதலமைச்சரை நியமிக்க வேண்டியுள்ளது. இந்நிலையில், முதலமைச்சருக்கு அடுத்த இடத்திலிருக்கும் துணை முதலமைச்சர் ஓ. பன்னீர்செல்வம் பொறுப்பு முதலமைச்சராக நியமிக்கப்பட வாய்ப்பு இருக்கிறது.
துணை முதலமைச்சர் பதவி என்ற ஒன்று சட்டத்தில் இல்லாத போதிலும், நிதி அமைச்சர் என்ற அடிப்படையில் ஓ. பன்னீர்செல்வத்திற்கு பொறுப்பு முதலமைச்சர் பதவி அளிக்கப்படலாம் எனக் கூறப்படுகிறது. 1980இல் முதலமைச்சராக இருந்த எம்ஜிஆர் சிகிச்சைக்காக வெளிநாடு சென்றபோது அப்போதைய நிதியமைச்சர் நெடுஞ்செழியனே பொறுப்பு முதலமைச்சராக நியமிக்கப்பட்டார்.
இருப்பினும் உள்ளாட்சித் துறை அமைச்சர் எஸ்.பி. வேலுமணி, மின்சாரத் துறை அமைச்சர் தங்கமணி பெயரும் பட்டியலில் உள்ளதாக கூறப்படுகிறது. இந்த வார இறுதியில் தமிழ்நாடு அமைச்சரவையைக் கூட்டி பொறுப்பு முதலமைச்சரை தேர்ந்தெடுத்து அவருக்கு முதலமைச்சருக்கான அதிகாரத்தை வழங்கப்படும் எனத் தெரிகிறது.
