பணப் பிரச்னை தொடர்பாக சக்தி பைனான்ஸ் நிறுவனத்திற்கு எதிராக எம்.சி. சுப்ரமணியம் என்பவர் உயர் நீதிமன்றத்தில் வழக்குத் தொடர்ந்திருந்தார். இந்த விவகாரத்தில் நீதிமன்றத்திற்கு வெளியில் பேச்சுவார்த்தை மூலம் தீர்வு காணப்பட்டதால், வழக்கை திரும்பப்பெற அனுமதி கோரி எம்.சி. சுப்ரமணியம் மனுத்தாக்கல் செய்தார். அந்த மனுவை ஏற்றுக்கொண்ட நீதிமன்றம், வழக்குத் தொடர்பாக செலுத்தப்பட்டக் கட்டணத்தை மனுதாரருக்குத் திரும்ப வழங்க உயர் நீதிமன்ற பதிவுத்துறைக்கு உத்தரவிட்டது.
அதன்படி பதிவுத்துறையை அணுகி நீதிமன்றக் கட்டணத்தை திரும்பத் தரக்கோரியபோது, வாபஸ் பெறப்பட்ட வழக்கிற்கு கட்டணத்தை திரும்பத்தர விதிகள் ஏதும் இல்லை என வாய்மொழியாக தெரிவிக்கப்பட்டது. இதையடுத்து, நீதிமன்ற கட்டணத்தை திரும்ப வழங்க உத்தரவிடக்கோரி எம்.சி. சுப்ரமணியம் வழக்குத் தொடர்ந்தார்.
இந்த வழக்கை விசாரித்த நீதிபதி எஸ்.எம். சுப்ரமணியம், லோக் அதாலத், சமரச தீர்வு மையம் ஆகியவற்றின் மூலம் தீர்வு காணும்போது, நீதிமன்ற கட்டணத்தை முழுமையாக திருப்பியளிக்கும் நிலையில், நீதிமன்றத்திற்கு வெளியில் தீர்வு காணப்பட்ட வழக்குகளுக்கான கட்டணத்தை திரும்ப வழங்க மறுப்பது பாரபட்சமானது எனக் கூறி முழு கட்டணத்தையும் திருப்பி வழங்க உத்தரவிட்டார்.
மேலும், வழக்குகளின் எண்ணிக்கை அதிகரித்து வரும் நிலையில், நீதிமன்றத்திற்கு வெளியில் பிரச்னைகளுக்குத் தீர்வு காண பல திட்டங்கள் அறிமுகப்படுத்தபட்டுள்ளன என்றும், அவற்றை ஊக்குவிக்க நீதிமன்ற கட்டணங்கள் திரும்பி வழங்கப்பட வேண்டுமெனவும் அறிவுறுத்தியுள்ளார்.
இதையும் படிங்க: நிர்பயா வழக்கு: குற்றவாளிகளின் கடைசி நிவாரண மனுக்கள் தள்ளுபடி
