தமிழக மக்கள் மட்டுமின்றி உலகத் தமிழர்கள் ஆவலோடு எதிர்பார்த்த, தமிழக சட்டப்பேரவை தேர்தல் நாளை நடக்க இருக்கிறது. ஒரு பக்கம் தேர்தல் வேலைகளில் படு சுறுசுறுப்பாக இயங்கி வரும் அரசியல் கட்சிகளின் வேட்பாளர்களையும், தலைவர்களையும், வெற்றி தோல்வி என்பதைத் தாண்டி ஒரு விஷயம் மட்டும் தூக்கமிழக்க வைத்துள்ளது. அதுதான் வருமான வரிச்சோதனை. தமிழகத்தில் தேர்தல் தேதி அறிவித்த நாள் முதல் நடந்து வரும் வருமான வரித்துறையின் அதிரடி சோதனைகளால், அரசியல்வாதிகள் விழி பிதுங்கி நிற்கின்றனர்.
தமிழகத்தில் 118 சட்டமன்ற தொகுதிகளில் வாக்காளர்களுக்கு பணப்பட்டுவாடா செய்ய வாய்ப்புள்ளதாக, இந்திய தேர்தல் ஆணையம் அளித்த தகவலை அடுத்து, சட்ட விரோத பணப்பரிமாற்றம், பணம் பதுக்கல் ஆகியவற்றை கண்காணிக்க, கட்டுப்பாட்டு அறை ஒன்றை நிறுவி தீவிர வேட்டையில் இறங்கியது வருமான வரித்துறை. கடந்த 2 மாதங்களாக வந்த 300க்கும் மேற்பட்ட புகார்கள் தொடர்பாக, திமுக, அதிமுக ஆகிய முக்கிய கட்சிகள் மட்டுமின்றி, அமமுக, மக்கள் நீதி மய்யம் உள்ளிட்ட கட்சி நிர்வாகிகளின் வீடு, அலுவலகங்களிலும் கடும் சோதனை நடத்தினர் வருமான வரித்துறையினர்.
வருமான வரித்துறையின் அதிரடிச் சோதனைக்கு இலக்கான இடங்களில் சில...
- விராலிமலை அதிமுக வேட்பாளர் அமைச்சர் விஜயபாஸ்கர் சகோதரரின் கல்லூரியில் பணிபுரியும் வீரபாண்டியின் வீடு
- சிவகங்கை அதிமுக பிரமுகரின் மனைவி ஆனந்தவல்லி வீடு
- அமைச்சர் எம்.சி. சம்பத்தின் சம்பந்தி இளங்கோவனின் டி.என்.சி நிறுவனம்
- சிவகாசியில் அமைச்சர் ராஜேந்திர பாலாஜியின் நண்பர் சீனிவாசனுக்கு சொந்தமான இடங்கள்
- திமுக தலைவர் மு.க.ஸ்டாலினின் மகள் செந்தாமரை மற்றும் மருமகன் சபரீசன் வீடு
- திருவண்ணாமலை திமுக வேட்பாளர் எ.வ.வேலு வீடு மற்றும் கல்லூரி
- அண்ணா நகர் சட்டப்பேரவை உறுப்பினர் மோகனின் மகன் கார்த்திக்கின் வீடு
- சேத்துப்பட்டில் உள்ள கியூ ஸ்கொயர் நிறுவனம்அமைச்சர் விஜயபாஸ்கர் சகோதரர் வீட்டில் சோதனை!
- சினிமா தயாரிப்பாளர் ஜெயராமனின் எஸ்.என்.ஜே நிறுவனம்
- முன்னாள் அமைச்சரும் கரூர் திமுக வேட்பாளருமான செந்தில்பாலாஜி வீடுகள் மற்றும் அவரது சகோதரர் அசோக் வீடு
- எஸ்.ஆர்.எம்.யூ பொதுச்செயலாளர் கண்ணையாவின் மகன் பிரகாஷுக்கு சொந்தமான பெரம்பூரில் உள்ள இடங்கள்
- மக்கள் நீதி மய்யம் கட்சியின் பொருளாளர் சந்திரசேகர் வீடு மற்றும் அலுவலகங்கள்
- மக்கள் நீதி மய்யத்தின் திருச்சி கிழக்கு தொகுதி வேட்பாளரின் நண்பர் வீடு
இப்படி அரசியல் கட்சி நிர்வாகிகள், தனி நபர்கள் என வருமான வரித்துறையினர் நடத்திய சோதனைகளின் பட்டியல், 300யும் தாண்டி நீள்கிறது. இதுவரை மொத்தம் 77 கோடி ரூபாய் பணம், 23 கோடி மதிப்புள்ள தங்க நகைகள் மற்றும் முக்கிய ஆவணங்கள் பறிமுதல் செய்யப்பட்டுள்ளதாக வருமான வரித்துறை தரப்பில் தெரிவிக்கப்பட்டுள்ளது. கடந்த 2016 சட்டப்பேரவை தேர்தலை ஒப்பிடும்போது, 65 கோடி ரூபாய்க்கும் அதிகமான ரொக்கம் மற்றும் நகைகள் தற்போது பறிமுதல் செய்யப்பட்டிருப்பதாகவும், 2019 ஆம் ஆண்டு நடந்த நாடாளுமன்ற தேர்தலில் போது, 81 கோடி ரூபாய் பறிமுதல் செய்யப்பட்டதாகவும் வருமான வரித்துறை கூறியுள்ளது.
தேர்தல் முடிவுகளை எண்ணி அரசியல்வாதிகள் கையை பிசைந்து கொண்டிருந்த காலம் போய், அடுத்த வருமான வரிச்சோதனை எங்கு நடக்குமோ என்று தெரியாமல் அனைத்து கட்சி அரசியல்வாதிகளும் அச்சத்தில் உள்ளனர். ஆனால், ஒரு கட்சியைத் தவிர. ஏனெனில் இதுவரை நடந்த சோதனைகளில் பாஜக தலைவர்கள், வேட்பாளர்கள் மற்றும் அவர்களுக்கு நெருக்கமானவர்களுக்கு சொந்தமான ஒரு இடத்தில் கூட, வருமான வரிச்சோதனை நடைபெறாதது மற்ற அரசியல் கட்சியினரை கேள்வி எழுப்ப வைத்திருக்கிறது.
தற்போது நடக்கும் வருமான வரிச்சோதனைகள் முழுக்க முழுக்க பாஜகவின் தூண்டுதலின் பேரிலேயே நடப்பதாகவும், இதனால் எதிர்க்கட்சிகளை பணிய வைத்துவிடலாம் என அக்கட்சி எண்ணுவதாகவும் தமிழக எதிர்க்கட்சித் தலைவர்கள் குற்றஞ்சாட்டுகின்றனர். திமுக தலைவர் ஸ்டாலின் மகள் வீட்டில் நடந்த சோதனைக்காக, ராகுல் காந்தி தொடங்கி இந்திய அளவில் உள்ள எதிர்க்கட்சித் தலைவர்கள் பலரும், வருமான வரிச்சோதனைக்காக மத்திய அரசை கண்டித்தது இங்கு கவனிக்கத்தக்கது.
கடந்த காலங்களிலும் தேர்தல் நேரத்தில் இது போன்ற வருமான வரிச்சோதனைகள் நடந்தன என்றாலும், தற்போது நடக்கும் சோதனைகளை எதிர்க்கட்சிகள் அச்சுறுத்தலாகவே பார்க்கின்றன. இதேபோன்ற நடைமுறையை பின்பற்றியே பல மாநிலங்களிலும் மற்ற கட்சியினரை பயமுறுத்தி பாஜக தன்வசப்படுத்தியதோடு, ஆட்சியிலும் அமர்ந்துள்ளதாக அவர்கள் திடுக்கிடும் குற்றச்சாட்டுகளை அடுக்குகின்றனர். பொது அமைப்பான வருமான வரித்துறை இதுபோன்ற குற்றச்சாட்டுகளுக்கு ஆளாகாமல் இருப்பதும், அதனை உறுதிப்படுத்துவதும் அரசை ஆள்வோரிடமே இருக்கிறது. ஏனெனில், வாக்களிக்கும் மக்கள் ஒரேமாதிரி எப்போதும் இருப்பதில்லை.
இதையும் படிங்க: வாக்குச் சாவடியில் வாக்காளர்கள் வாக்களிக்கும் நடைமுறை - தேர்தல் ஆணைய வழிகாட்டி கையேடு!
