அஸ்ஸாம் மாநிலம் கவுஹாத்தியைச் சேர்ந்த ஜாய்ஸ்மிதா சாண்டோ என்ற சிறுமிக்கு திடீரென வலது முழங்காலில் கடுமையான வலி ஏற்பட்டு அசைவுகள் பாதிக்கப்பட்டன. கடும் வலியால் துடித்த அச்சிறுமி சென்னை அப்பல்லோ மருத்துவமனைக்கு அழைத்து வரப்பட்டார். பரிசோதனை செய்ததில் ’டிஸ்காய்ட் லேடரல் மெனிஸ்கஸ் டியர்’ என்ற குறைபாட்டால் அவர் பாதிக்கப்பட்டிருந்தது தெரியவந்தது.
மெனிஸ்கஸ் மூட்டுப்பகுதி தசைக் குருத்தெலும்பு என்பது முழங்காலை பாதுகாக்கும் வகையில் அதிர்வுகள் மற்றும் அசைவுகளை ஏற்கும் நெகிழ்வு தன்மை கொண்ட மென்மையான குருத்தெலும்பு ஆகும். பிறக்கும் போது டிஸ்காய்டு மெனிஸ்கஸ் இருந்தால் சிலருக்கு முழங்கால் இயக்கங்களின்போது காயங்கள் ஏற்படக்கூடும். வழக்கமான செயல்பாடுகளின்போது அல்லது விளையாடும்போது முழங்கால் அசைவில் ஏற்படும் மாற்றங்களால் இந்த காய பாதிப்பு ஏற்பட வாய்ப்புள்ளது.
இந்த நிலை ஏற்பட்டால் பெரும்பாலும் அந்நோயாளிகளுக்கு அறுவை சிகிச்சையே பரிந்துரைக்கப்படுகிறது. இந்நிலையில், பாதிக்கப்பட்ட அச்சிறுமிக்கு, ஆர்த்ரோஸ்கோபிக் லேடரல் டிஸ்காய்டு மெனிஸ்கஸ் சாஸரைசேஷன் சிகிச்சை முறை செய்யப்பட்டு, அதன் மூலம் அந்தக் குறைபாடு சரி செய்யப்பட்டது. கீஹோல் முறையிலான இந்த சிகிச்சையில் குழந்தைகளுக்கென்றே சிறப்பாக வடிவமைக்கப்பட்ட அதிநவீன கருவி பயன்படுத்தப்பட்டது.
இதுகுறித்து பேசிய அப்பல்லோ மருத்துவமனையின் எலும்பியல் அறுவை சிகிச்சை நிபுணர் விஜயா கிஷோர் ரெட்டி, ” இந்தியாவில் டிஸ்காய்டு மெனிஸ்கஸ் பாதிப்புக்காக, கீஹோல் முறையில் சிகிச்சை செய்யப்பட்ட மிகச்சிறு வயது குழந்தை இதுவாகும். சுறுசுறுப்பாக செயல்படும் குழந்தைகள் மற்றும் இளைஞர்கள் சில நேரங்களில், முழங்காலில் அதிர்ச்சி உறிஞ்சியாக உள்ள மெனிஸ்கஸ் குருத்தெலும்பு கிழிந்து பாதிக்கப்பட வாய்ப்புள்ளது.
பெரும்பாலும் இதற்கு ஆர்த்ரோஸ்கோபி எனப்படும் குறைந்தபட்ச ஊடுருவல் முறையைப் பயன்படுத்தி அறுவை சிகிச்சை மூலம் சிகிச்சை அளிக்கப்படுகிறது. ஆனால், அஸ்ஸாம் சிறுமிக்கு ஏற்கனவே ஒரு அசாதாரண டிஸ்காய்டு மெனிஸ்கஸ் இருந்து பாதிக்கப்பட்டிருந்தது. ஏழு மாத துயரத்திற்குப் பிறகு தற்போது, அறுவை சிகிச்சை செய்யப்பட்ட ஒரே நாளில் தங்கள் குழந்தை சிரமமின்றி நடப்பதை அதன் பெற்றோர் பார்த்து மகிழ்ந்தனர் “ என்றார்.
இதையும் படிங்க: ஆலந்தூரில் ஏற்பட்ட திடீர் பள்ளம்!
