தமிழ்நாடு சிறைத் துறை சார்பில் கரோனா அச்சுறுத்தலைத் தொடர்ந்து சிறைக் கைதிகளைச் சந்திக்க பல்வேறு கட்டுப்பாடுகள் விதிக்கப்பட்டுள்ளன. இது தொடர்பாக சிறைத் துறை வெளியிட்டுள்ள அறிக்கையில்:
- ஒருவர் சிறையில் அனுமதிக்கப்படுவதற்கு முன்பாகவே முழு பரிசோதனைக்கு உட்படுத்தப்பட வேண்டும். இருமல், சளி, காய்ச்சல் உள்ளிட்ட அறிகுறிகள் இருந்தால் தனிமைப்படுத்தி உடனடியாக அரசு மருத்துவமனையில் சேர்க்க வேண்டும்.
- அனைத்து சிறைவாசிகளுக்கும் மருத்துவப் பரிசோதனை செய்ய வேண்டும். காய்ச்சல், சளி, இருமல் உள்ள சிறைவாசிகளை தற்காலிக தடுப்புக் காப்பு அறைகள் அமைத்து அடைக்க வேண்டும்.
- சிறைவாசிகளுக்கு சோப்புகள் வழங்கவும், அவ்வப்போது கைகளைக் கழுவும் விழிப்புணர்வையும் ஏற்படுத்த வேண்டும். அவை முறையாகக் கவனிக்கப்படவும் வேண்டும்.
- கைதிகளை சந்திக்கவரும் வழக்குரைஞர்கள் சிறையினுள் அனுமதிக்கப்படும் முன், கைகளை சோப் மூலம் சுத்தம் செய்துகொண்ட பின்னரே அனுமதிக்கப்பட வேண்டும். வழக்குரைஞர் மற்றும் கைதிகளுக்கு இடையே சுமார் 6 அடி இடைவெளி இருக்க வேண்டும்.
- வழக்குரைஞர், சிறைவாசி இருவரும் முகக்கவசம் கட்டாயம் அணிந்திருக்க வேண்டும். ஒருவரை ஒருவர் தொடுவதை முற்றிலுமாக தவிர்க்க வேண்டும்.
- யோகா, தியானம் போன்றவற்றைத் தவிர அனைத்து அரசு சாரா தொண்டு நிறுவனங்கள், கல்வி சம்பந்தமான பார்வையாளர்களை, ஒரு மாதக் காலத்திற்கு சிறையினுள் அனுமதிப்பது நிறுத்திவைக்கப்பட வேண்டும்.
- பணி நேரத்தில் உள்ள அனைத்துக் காவலர்கள், அலுவலர்களுக்கு முகக்கவசம் வழங்க வேண்டும்.
- பெரும்பாலான நேரங்களில் சிறைவாசிகளை நீதிமன்றங்களில் முன்னிலைப்படுத்துவதைத் தவிர்த்து, காணொலி காட்சி மூலம் முன்னிலைப்படுத்த வேண்டும்.
எனத் தெரிவிக்கப்பட்டுள்ளது.
இதையும் படிங்க: அவசர வழக்குகளுக்கு மட்டுமே விசாரணை: சென்னை உயர் நீதிமன்றம் முடிவு
