சென்னை: கலைவாணர் அரங்கத்தில் தமிழ்நாடு திருத்திய வரவு-செலவுத் திட்ட அறிக்கை கூட்டத்தொடர் தற்போது நடைபெற்றுவருகிறது. இதில் துறை ரீதியான மானியக் கோரிக்கைகள் மீதான விவாதமும் அமைச்சர்களின் பதிலுரை-அறிவிப்புகளும் நடைபெற்றுவருகின்றன.
இன்று நடைபெற்றுவரும் கூட்டத் தொடரின்போது, 'திருப்பரங்குன்றத்தில் புதிய கலை அறிவியல் கல்லூரி தொடங்க அரசு முன்வருமா' எனத் திருப்பரங்குன்றம் சட்டப்பேரவை உறுப்பினர் ராஜன் செல்லப்பா கேள்வி நேரத்தின்போது கேட்டார்.
மேலும் அரசு உதவி பெறும் கல்லூரிகளில் 25 விழுக்காடு கூடுதல் இட ஒதுக்கீடு அளிக்க வேண்டும் எனவும் அவர் கோரிக்கைவிடுத்தார்.
இதற்குப் பதிலளித்துப் பேசிய அமைச்சர் பொன்முடி, "திருப்பரங்குன்றத்தில் புதிய கலை அறிவியல் கல்லூரி தொடங்கும் எண்ணம் அரசுக்கு இல்லை. தற்போது போடப்பட்ட அரசாணை 25 விழுக்காடு அரசு கல்லூரிகளுக்கு மட்டும்தான்.
தனியார் கல்லூரிகளைப் பொறுத்தவரையில் ஏற்கனவே 10 விழுக்காடு ஒதுக்கீடு அளிக்க அறிவுறுத்தப்பட்டுள்ளது. அதை 15 விழுக்காடாக அதிகரிக்க நடவடிக்கை எடுக்கப்பட்டுவருகிறது" என்றார்.
இதையும் படிங்க: கொடிவேரி கூட்டுக்குடிநீர்: அக்டோபரில் தொடங்கிவைக்கிறார் ஸ்டாலின்
