கரோனாவுக்குப் பின் கடந்த ஏழு மாதங்களாக தொடர்ந்து டீசல் விற்பனை இந்தியாவில் அதிகரித்துவந்தது. இருப்பினும், கடந்தாண்டு நவம்பர் மாதத்துடன் ஒப்பிடுகையில் இந்தியாவில் டீசல் விற்பனை 7 விழுக்காடு சரிந்துள்ளது.
நவம்பரில் 6.23 மில்லியன் டன் டீசல் பயன்படுத்தப்பட்டது. ஒரு ஆண்டிற்கு முன்பு இதே காலத்தில் 6.7 மில்லியன் டன் டீசல் விற்பனை செய்யப்பட்டிருந்தது. இருப்பினும், இது அக்டோபர் மாதம் விற்பனை செய்யப்பட்ட 5.7 மில்லியன் டன் டீசலைவிட அதிகமாகும். செப்டம்பர் மாதம் டீசல் விற்பனை கரோனாவுக்கு முந்தைய நிலையை எட்டிய பின்னர், நவம்பரில் வீழ்ச்சியடைந்தது, நுகர்வு பலவீனமாக உள்ளதையே காட்டுகிறது என்பதே வல்லுநர்களின் கருத்தாகும்.
மறுபுறம், பெட்ரோல் விற்பனை 2.28 மில்லியன் டன்னிலிருந்து 2.4 மில்லியன் டன்னாக உயர்ந்தது. அதே நேரத்தில் சமையல் எரிவாயு (எல்பிஜி) விற்பனை 4.5 விழுக்காடு அதிகரித்து, 2.36 மில்லியன் டன்னாக உள்ளது. விமானங்களில் பயன்படுத்தப்படும் ஏவியேஷன் டர்பைன் எரிபொருள் (ஏடிஎஃப்) விற்பனை ஆண்டுக்கு 48 விழுக்காடு குறைந்து 3 லட்சத்து 46,000 டன்னாக உள்ளது.
அக்டோபர் மாதத்தில் பெட்ரோலிய பொருள்களுக்கான மொத்த தேவை 2.5 விழுக்காடு உயர்ந்து 17.77 மில்லியன் டன்களை எட்டியது. செப்டம்பர் மாதத்திலேயே பெட்ரோல் விற்பனை கரோனாவுக்கு முந்தைய நிலையை எட்டியிருந்தாலும், டீசல் நுகர்வு அக்டோபரில்தான் இயல்பு நிலைக்குத் திரும்பியது.
முன்னதாக, கரோனா பரவலைக் கட்டுப்படுத்த அமல்படுத்தப்பட்ட பொது ஊரடங்கு காரணமாக எரிபொருள் தேவை 49 விழுக்காடு வரை குறைந்திருந்தது குறிப்பிடத்தக்கது.
இதையும் படிங்க: 'ஆக்ஸ்போர்ட் கரோனா தடுப்பு மருந்து பாதுகாப்பானது, பக்கவிளைவுகள் அற்றது' - சீரம்
