ஹாங்காங் (சீனா) : டிக்டாக் நிறுவனத்தின் தலைமை நிர்வாக அலுவலர் கெவின் மேயர், தான் வகித்த பதவியை விட்டு விலகுவதாக அறிவித்துள்ளார்.
இது குறித்து அவர் நிறுவன ஊழியர்களுக்கு எழுதியிருக்கும் கடிதத்தில், “நான், கனத்த இதயத்தோடு தான் நிறுவனத்தை விட்டு வெளியேற முடிவு செய்துள்ளேன் என்பதை உங்கள் அனைவருக்கும் தெரியப்படுத்திக் கொள்கிறேன். டிக் டாக் பொது மேலாளர் வனேசா பப்பாஸ் இடைக்கால தலைமை நிர்வாக அலுவலராக இருப்பார்” என்றும் அதில் குறிப்பிட்டுள்ளார்.
இந்தியா - சீனா எல்லை மோதலைத் தொடர்ந்து இந்தியாவின் இறையாண்மை, ஒருமைப்பாடு, பாதுகாப்பு ஆகியவற்றுக்கு அச்சுறுத்தல் இருப்பதாகக் கூறி சீனாவை சேர்ந்த டிக் டாக், ஹலோ உள்ளிட்ட 59 கைப்பேசி செயலிகளுக்கு இந்தியாவில் தடை விதிக்கப்பட்டது. இதையடுத்து, சீன உளவுத்துறையின் ஒரு கருவியாக இருக்கக்கூடும் என்றும், தேசிய பாதுகாப்பைக் கருதியும், அமெரிக்காவும் டிக் டாக் செயலிக்கு தடைவிதிக்க முடிவுசெய்தது.
அதன்படி, டிக் டாக், வீ சாட் ஆகிய சீன செயலிகள் அடுத்த 90 நாள்களுக்குள் அமெரிக்காவில் தடை செய்யப்படும் என அதிபர் ட்ரம்ப் அதிரடியாக அறிவித்தார். அமெரிக்காவில் டிக் டாக் இயங்க வேண்டும் என்றால், தங்களிடம் நிறுவனத்தை கொடுக்கும்படியும் ட்ரம்ப் அரசு கிடுக்குப்புடி பிடித்தது.
ஆனால் அமெரிக்காவின் இந்தக் குற்றச்சாட்டை முற்றிலும் மறுத்த டிக் டாக்கின் தாய் நிறுவனமான பைட் டான்ஸ் "டிக் டாக்கின் அமெரிக்கப் பயனர்களின் தனியுரிமை தகவல்களின் பாதுகாப்பை உறுதி செய்ய பல்வேறு கட்ட நடவடிக்கைகளை எடுத்துள்ளோம்" எனத் தெரிவித்தது.
மேலும் அமெரிக்காவில் டிக் டாக் தடை விதிக்கப்பட்டால் நீதிமன்றத்தை நாடுவோம் எனவும் அந்நிறுவனம் எச்சரித்திருந்தது. இதனைத் தொடர்ந்து அமெரிக்க நீதிமன்றங்களில் பைட் டான்ஸ் நிறுவனம் டிக்டாக் தடைக்கு எதிராக வழக்குத் தொடர்ந்துள்ளது குறிப்பிடத்தக்கது.
