நாட்டில் நாளுக்கு நாள் வேகமாகப் பரவி வரும் கரோனா தொற்றைக் கட்டுப்படுத்தும் நோக்கில் மத்திய அரசு மாநிலங்களுக்கிடையேயான போக்குவரத்தை ரத்து செய்துள்ளது. கரோனா பரவலைக் கட்டுப்படுத்த அமல்படுத்தப்பட்ட ஊரடங்கால் வெளி மாநிலத் தொழிலாளர்கள் வேலை இழந்து பெரும் பாதிப்புகளுக்கு ஆளாகியுள்ளனர்.
இந்நிலையில், இவர்களின் நலனைக் கருத்தில் கொண்டு சம்பந்தப்பட்ட மாநில அரசுகளின் உதவியுடன் சிறப்புப் பேருந்துகள் மூலமோ, ரயில்கள் மூலமோ வெளிமாநிலத் தொழிலாளர்கள் அவர்களது மாவட்ட நிர்வாகத்தின் உதவியுடன் சொந்த ஊர்களுக்கு அனுப்பி வைக்கப்படுகின்றனர்.
அந்த வகையில், கோவையிலிருந்து இதுவரை நூற்றுக்கும் மேற்பட்ட சிறப்பு பேருந்துகள் மூலம் வெளிமாநிலத் தொழிலாளர்கள் அவர்களது சொந்த ஊர்களுக்கு அனுப்பி வைக்கப்பட்டுள்ளனர்.
இந்நிலையில் இன்று கோவை மாவட்ட ஆட்சியர் அலுவலகத்திலிருந்து இரண்டு சிறப்புப் பேருந்துகள் மூலம் திரிபுராவைச் சேர்ந்த 55 பேர் அவர்களது மாநிலத்திற்கு அனுப்பி வைக்கப்பட்டனர்.
இவர்கள் சென்னை வரை சிறப்புப் பேருந்திலும், தொடர்ந்து சென்னையிலிருந்து, சிறப்பு ரயில்கள் மூலம் திரிபுராவிற்கும் செல்ல உள்ளனர்.
இவர்கள் அனைவரும் கோவை மாவட்டத்தில் பல்வேறு பகுதிகளில் தங்கி வேலை செய்து வந்தவர்கள். இவர்கள் திரிபுரா மாநில அரசிடம் ஊர் திரும்புவதற்காக உரிய அனுமதி பெற்று, அம்மாநில அரசின் உதவுயுடன் சொந்த ஊருக்கு செல்கின்றனர்.
இவர்களுக்கு முறையான மருத்துவப் பரிசோதனைகள் செய்யப்பட்டு, தேவையான உணவுப் பொருள்கள் வழங்கப்பட்டப்பின் கோவையிலிருந்து புறப்பட்டுச் சென்றனர்.
இதையும் படிங்க :கரோனா பாதிப்பு: காந்திபுரம் கிராஸ்கட் சாலை மூடல்!
