தமிழ்நாட்டில் இன்று (ஜூலை 12) மேலும் 4 ஆயிரத்து 244 பேருக்கு கரோனா தொற்று உறுதி செய்யப்பட்டுள்ளது. இதனால் கரோனாவால் பாதிக்கப்பட்டவர்களின் எண்ணிக்கை 1 லட்சத்து 38 ஆயிரத்து 470ஆக அதிகரித்துள்ளது. இன்று கரோனாவுக்கு 68 பேர் உயிரிழந்ததால், இறப்பு எண்ணிக்கை ஆயிரத்து 966ஆக அதிகரித்துள்ளது. தமிழ்நாட்டில் மீண்டும் 4 ஆயிரத்திற்கும் கரோனா பாதிப்பு பதிவாகியுள்ளது.
அதேபோல் கடந்த 24 மணி நேரத்தில் 3,617 பேர் வைரஸ் தொற்றிலிருந்து குணமடைந்து வீடு திரும்பினர். இதன்மூலம் தமிழ்நாட்டில் குணமடைந்தோரின் எண்ணிக்கை 89 ஆயிரத்து 532ஆக அதிகரித்துள்ளது.
சென்னையைத் தவிர்த்து பிற மாவட்டங்களில் இன்று 3 ஆயிரத்து 076 பேருக்கு கரோனா தொற்று உறுதி செய்யப்பட்டுள்ளது. சென்னையில் ஆயிரத்து 168 பேருக்கு புதிதாக கரோனா பாதிப்பு உறுதியாகியுள்ளது. இதன்மூலம் சென்னையில் கரோனாவால் பாதிக்கப்பட்டவர்களின் எண்ணிக்கை 77 ஆயிரத்து 338ஆக அதிகரித்துள்ளது.
