உலக சிங்கங்கள் தினம் - வனவேந்தனை காப்பது நமது கடமை

சிக்கல்களைக் கடந்து வாழ்வது என்பது மனிதர்களுக்கு மட்டுமல்ல; மற்ற உயிரினங்களுக்கும்தான். நம்மால் முடிந்தவரை மற்ற உயிரினங்களுக்குத் தொல்லை தராமல் வாழ்வோம், அது உலக சிங்கங்கள் தினம் இன்றிலிருந்து தொடங்குவோம்.

சென்னை: சிங்கங்கள் என்றால் யாருக்குத்தான் பிடிக்காது. காட்சிக்கு அழகாக இருந்தாலும் மிகவும் ஆபத்தானது இந்த ‘வன ராஜா’. தனக்குப் பசி எடுத்தால் மட்டுமே வேட்டையாடும் சிறப்பு குணம் கொண்டதால் இவை ‘காட்டின் ராஜா’ என்று அழைக்கப்படுகிறது. இதனைப் பெருமைப்படுத்தும்விதமாக ஆகஸ்ட் 10ஆம் தேதியான இன்று உலக சிங்கங்கள் தினம் கொண்டாடப்படுகிறது.

காட்டில் உள்ள விலங்குகளை அச்சமூட்டக்கூடிய ஒரு விலங்காக விளங்குகின்ற சிங்கத்திற்கு மரியாதை செலுத்தும்விதமாக இந்த நிகழ்வினை, ‘பிக் கேட் ரெஸ்க்யூ’ என்னும் அமைப்பு உருவாக்கியது. இதுவே சிங்கங்களுக்கென்று பிரத்யேகமாக அமைந்த ஒரு சரணாலயமாகத் திகழ்கிறது. இந்நாளில் உலகில் பல இடங்களில் சிங்கங்களுக்கு மரியாதையும் செலுத்தப்படுகிறது.

தாய் சிங்கமும் குட்டியும்

மனிதர்கள் பன்நெடுங்காலமாக சிங்கங்களுடன் தொடர்பில் இருந்ததாக வரலாறு கூறுகிறது. பிரான்ஸின் கிழக்குப்பகுதியில் அமைந்துள்ள, அர்டேக் பள்ளத்தாக்குப் பகுதியில் கண்டுபிடிக்கப்பட்ட ‘பேலியோலித்திக்’ கால மனிதனின் குகை ஓவியங்களில்கூட சிங்கங்களின் ஓவியங்கள் காணப்படுகின்றன.

மனிதர்களும், சிங்கங்களும்

வரலாற்றைப் புரட்டிப்பார்த்தால் சிங்கங்கள், யூரேசியா, வட அமெரிக்கா வழியாக தென் அமெரிக்கா வரை காணப்பட்டன. தற்போதைய சூழலில் சஹாரா பகுதிகளை ஒட்டிய ஆப்பிரிக்க நாடுகள், இந்தியாவின் வடமேற்குப் பகுதிகள் ஆகியவற்றில் மட்டுமே காணப்படுகின்றன.

கிறிஸ்தவ புனித நூலான பைபிளில் 157 இடங்களில் சிங்கங்களைப் பற்றிய குறிப்புகள் வருகின்றன. வேறு எந்த விலங்குகளை பற்றியும் இந்த அளவுக்கு குறிப்புகள் இல்லை. அரபு நாடுகளில் வீட்டு விலங்குகள்போல் சிலர் சிங்கங்களை வளர்த்தும் வருகின்றனர்.

மனிதர்களுடன் சிங்கங்கள்

சிங்கங்களுக்கு சிக்கல்

சிங்கங்களின் வாழ்விடங்கள் அழிக்கப்படுவது, உணவு கிடைக்காமல் போவது, மனிதர்களால் ஏற்படும் பிரச்சினை ஆகியவையே தற்போது சிங்கங்களுக்கான தலையான சிக்கல்கலாக உள்ளன. ஆப்பிரிக்காவில் சிங்கங்களின் எண்ணிக்கை கொஞ்சம் குறைந்துவருகிறது. ஆனால் இந்தியாவைப் பொறுத்தவரை சிங்கங்களின் எண்ணிக்கை குறிப்பிடத்தக்க அளவில் அதிகரித்துவருகிறது.

சிங்கக்குட்டிகள்

தமிழ்நாட்டில் கரோனா தொற்றால் மனிதர்கள் மட்டுமில்லாமல், வண்டலூர் அறிஞர் அண்ணா உயிரியல் பூங்காவிலிருந்த இரண்டு சிங்கங்கள் கவலைக்கிடமான நிலையில் இருந்தன. தீவிர சிகிச்சை அளிக்கப்பட்டும் ஒரு சிங்கம் உயிரிழந்தது.

சிக்கல்களைக் கடந்து வாழ்வது என்பது மனிதர்களுக்கு மட்டுமல்ல மற்ற உயிரினங்களுக்கும்தான். நம்மால் முடிந்தவரை மற்ற உயிரினங்களுக்கு பாதிப்பு ஏற்படுத்தாமல் வாழ்வோம், அது உலக சிங்கங்கள் தினமான இன்றிலிருந்து தொடங்குவோம்.