டெல்லி: காங்கிரஸ் முன்னாள் தலைவரும், நாடாளுமன்ற உறுப்பினருமான ராகுல் காந்தி டெல்லியிலுள்ள கட்சியின் தலைமையகத்தில் செய்தியாளர்களைச் சந்தித்தார். அப்போது பேசிய அவர், " கிழக்கு லடாக்கின் நிலைமை குறித்து பாதுகாப்பு அமைச்சர் ராஜ்நாத் சிங் அறிக்கை ஒன்றை வெளியிட்டுள்ளார். அந்த அறிக்கையின்படி, தற்போது இந்திய துருப்புகள் மூன்றாம் விரல் எல்லைப் பகுதியில் நிறுத்தப்படுவதாகத் தெரிகிறது.
நான்காம் விரல் எல்லைப் பகுதி இந்தியாவிற்குச் சொந்தமானது. ஆனால், இந்திய துருப்புகள் நான்காம் விரல் பகுதியிலிருந்து மூன்றாம் விரல் பகுதிக்கு நகர்ந்துள்ளன. இதற்கு என்ன காரணம், பிரதமர் மோடி நமது பகுதியை சீனர்களுக்கு விட்டுவிட்டாரா?
பிரதமர் ஒரு கோழை, அவர் சீனர்களுக்கு ஆதரவாக நிற்க முடியாது. அவர் ராணுவ வீரர்களின் தியாகத்தை துச்சமென எண்ணி அவற்றை காட்டிக் கொடுக்கிறார். இந்தியாவில் இதைச் செய்ய யாரும் அனுமதிக்கக் கூடாது.
சீனா நுழைந்த இடத்தில் மிக முக்கியமான பகுதியான டெப்சாங் சமவெளி குறித்து பாதுகாப்பு அமைச்சர் ஒரு வார்த்தைகூட பேசவில்லை. உண்மை என்னவென்றால், பிரதமர் இந்தியப் பகுதியை சீனாவுக்குக் கொடுத்திருக்கிறார். இதுதொடர்பாக அவர் நாட்டிற்குப் பதிலளிக்க வேண்டும்.
இந்த நாட்டின் பகுதிகளை பாதுகாப்பது பிரதமரின் பொறுப்பாகும். அவர் அதை எப்படிச் செய்வது என்பது அவருடைய பிரச்சினை; என்னுடையது அல்ல" எனக் கூறியுள்ளார்.
