மத்தியபிரதேசம்: உத்தரப்பிரதேசத்தில் கடந்த 2005ஆம் ஆண்டு நடந்த பகுஜன் சமாஜ் கட்சி எம்எல்ஏ ராஜூபால் கொலை வழக்கில் முக்கிய சாட்சியாக இருந்த வழக்கறிஞர் உமேஷ் பால் கடந்த பிப்ரவரி மாதம் சுட்டுக் கொல்லப்பட்டார்.
உமேஷ் பால் கொலை வழக்கில் தேடப்பட்டு வந்த, சமாஜ்வாடி கட்சியின் முன்னாள் எம்எல்ஏ அத்திக் அகமதுவின் மகன் ஆசாத் மற்றும் அவரது உதவியாளர் நேற்று (ஏப்.13) என்கவுன்ட்டரில் கொல்லப்பட்டனர். இந்த என்கவுன்ட்டரை நடத்திய காவல் துறைக்கு உத்தரப்பிரதேச முதலமைச்சர் யோகி ஆதித்யநாத் பாராட்டுத் தெரிவித்திருந்தார். உத்தரப் பிரதேசத்தில் மாஃபியாக்கள் அழிக்கப்பட்டு வருவதாகவும் கூறியிருந்தார்.
இந்த நிலையில், இரண்டு நாட்கள் பயணமாக மத்தியப் பிரதேச மாநிலம் இந்தூருக்கு சென்றுள்ள, உத்தரப்பிரதேச முன்னாள் முதலமைச்சரும், சமாஜ்வாடி கட்சித் தலைவருமான அகிலேஷ் யாதவ், மோவில் அம்பேத்கர் ஜெயந்தியையொட்டி அம்பேத்கர் நினைவிடத்திற்குச் சென்று மரியாதை செலுத்தினார்.
பின்னர் செய்தியாளர்களுக்குப் பேட்டியளித்த அகிலேஷ் யாதவ், "தற்போது அரசியல் சாசனம் அச்சுறுத்தலுக்கு உள்ளாகியிருக்கிறது. மத்தியிலும் மாநிலங்களிலும் உள்ள பாஜக அரசுகள் அம்பேத்கர் மக்களுக்காக வழங்கிய அரசியலமைப்பை அழித்து வருகின்றன.
சமாஜ்வாடி கட்சி மாஃபியாவுடன் எப்போதும் இருந்ததில்லை. உத்தரப்பிரதேச பாஜக அரசு தேர்தலைக் கருத்தில் கொண்டு போலி என்கவுன்ட்டர்களை நடத்தி வருகிறது. இந்த அரசால், கான்பூரில் ஆக்கிரமிப்பு அகற்றம் என்ற பெயரில் தாய்-மகள் எரித்துக் கொல்லப்பட்டனர்.
என்கவுன்ட்டர்கள் போன்ற காவல்துறை நடவடிக்கைகளுக்காக, உத்தரப்பிரதேச அரசுக்கு மனித உரிமைகள் ஆணையத்திடமிருந்து ஏன் அதிக நோட்டீஸ்கள் வந்துள்ளன? - லாக் அப் மரணங்கள் எண்ணிக்கையில் உத்தரப்பிரதேசமும் முன்னணியில் உள்ளது" என்று கூறினார்.
இதையும் படிங்க: உமேஷ் பால் கொலையில் தொடர்புடைய நபரை என்கவுன்ட்டர் செய்த போலீஸ்!
