புதுச்சேரி: பள்ளிப் பருவங்களில் மதிப்பெண்களுக்கு அதிக முக்கியத்துவம் கொடுப்பதால், மாணவர்களால் விளையாட்டில் கோலோச்ச முடிவதில்லை. இது ஒருபுறமிருக்க, மாணவர்களுக்கு ஆர்வம் இருந்தாலும் கூட பயிற்சி எடுத்துக் கொள்ள சில கிராமங்களில் மைதானம் இருப்பதில்லை.
அப்படிப்பட்ட பிரச்சினையைத்தான் புதுச்சேரி வீராம்பட்டினம் என்ற மீனவ கிராமம் வெகு ஆண்டுகளாகச் சந்தித்து வந்தது. இந்த நிலையை மாற்ற நினைத்தார் சிங்காரவேலர் அரசுப் பள்ளி உடற்கல்வி ஆசிரியர் கோபு.
விளையாட்டு மைதானமாக மாறிய பூங்கா
இதற்காக அவர், வீராம்பட்டினத்தில் 20 ஆண்டுகளுக்கும் மேலாகப் புதர் மண்டிக் கிடந்த பூங்கா ஒன்றைச் சீரமைத்து மைதானமாக்க முடிவு செய்தார். அம்மாநில நீர்வளத்துறையின் கட்டுப்பாட்டிலிருந்து, இந்தப் பூங்காவை அரசு அனுமதியுடன் விளையாட்டு மைதானமாக மாற்றி உள்ளார். இவரது இந்த முயற்சியில், சிங்காரவேலர் அரசுப் பள்ளி, மீனவ பஞ்சாயத்தின் உதவியும் உறுதுணையாக இருந்தது.
தடகள வீரர்கள்
முதலில் 20 மாணவர்கள், இந்த மைதானத்தில் பயிற்சி எடுக்க வருகை தந்தனர். கோபுவின் நல்ல பயிற்சியாலும், வழிகாட்டுதலாலும் மேலும் 100 மாணவர்களை வரவழைத்தது. ஆர்வமுள்ள ஆசிரியர்களும் மாணவர்களுக்குப் பயிற்சிகளைக் கொடுக்கின்றனர்.
தற்போது இந்த மைதானம் உள்ளூர் மாணவர்களின் வரப்பிரசாதமாகத் திகழ்கிறது. ஒவ்வொரு கிராமத்திலும் ஆசிரியர் கோபு போல, வீணாகும் ஏதேனும் ஒரு இடத்தை விளையாட்டு மைதானமாக மாற்றி பயிற்சி அளிக்கும்பட்சத்தில் மாணவர்களுக்கு விளையாட்டின் மீது பெரிய நம்பிக்கை ஏற்படும் என்பதில் மாற்றுக்கருத்தில்லை.
இதையும் படிங்க: மாணவர்கள் இருக்கும் இடத்திற்கே சென்று கல்வி கற்பிக்கும் ஆசிரியர்!
