கின்னஸ் சாதனை படைத்த பிரதமர் மோடியின் யோகா தின விழா!

நியூ யார்க் நகரில் உள்ள ஐநா தலைமை அலுவலகத்தில் பிரதமர் மோடி தலைமையில் நடைபெற்ற சர்வதேச யோகா தின விழா அதிக நாடுகளைச் சேர்ந்தவர்கள் கலந்து கொண்ட யோகா விழாவாக கின்னஸ் சாதனை புத்தகத்தில் இடம் பிடித்தது.

நியூ யார்க் : பிரதமர் மோடி கலந்து கொண்ட ஐநா தலைமை அலுவலகத்தில் நடைபெற்ற யோகா தின விழா கின்னஸ் புத்தகத்தில் இடம் பிடித்து உள்ளது.

அமெரிக்க அதிபர் ஜோ பைடனின் அழைப்பை ஏற்று 5 நாள் பயணமாக பிரதமர் மோடி அமெரிக்க சென்றுள்ளார். தனது முதல் நாள் பயணத்தில் அமெரிக்க பயணத்தில் டெஸ்லா நிறுவனர் எலான் மஸ்க், பல்வேறு துறைகளைச் சேர்ந்த வல்லுநர்களுடன் பிரதமர் மோடி பேச்சுவார்த்தை நடத்தினார்.

தொடர்ந்து நியூ யார்க் நகரில் உள்ள ஐநா தலைமை அலுவலகத்தில் நடைபெற்ற 9வது சர்வதேச யோகா தின விழாவில் பிரதமர் மோடி கலந்து கொண்டார். பிரதமர் மோடி தலைமையில் நடைபெற்ற சர்வதேச யோகா தின விழாவில் தூதர்கள், அதிகாரிகள், கல்வியாளர்கள், சுகாதார வல்லுநர்கள், தொழில்நுட்ப வல்லுநர்கள், தொழில்துறை தலைவர்கள், ஊடகத் துறையினர், கலைஞர்கள், ஆன்மீகத் தலைவர்கள் மற்றும் யோகா பயிற்சியாளர்கள் உட்பட அனைத்து தரப்பு பிரமுகர்கள் கலந்து கொண்டனர்.

ஏறத்தாழ 180க்கும் மேற்பட்ட நாடுகளைச் சேர்ந்த பிரதிநிதிகள் இந்த யோகா தின நிகழ்ச்சியில் பிரதமர் மோடியுடன் கலந்து கொண்டனர். இந்நிலையில், பிரதமர் மோடி தலைமையில் நடைபெற்ற சர்வதேச யோகா தின விழா கின்னஸ் புத்தகத்தில் இடம் பிடித்து உள்ளது. அதிகளவிலான நாடுகளைச் சேர்ந்தவர்கள் கலந்து கொண்ட யோகா விழா என்ற தலைப்பில் கின்னஸ் புத்தகத்தில் இடம் பிடித்ததாக அதிகாரிகள் தெரிவித்து உள்ளனர்.