நாடாளுமன்ற குளிர்கால கூட்டத்தொடர், நவம்பர் மாத இறுதியில் நடத்தப்படுவது வழக்கம். கரோனா அச்சுறுத்தல் காரணமாக, இந்தாண்டு இதுவரை குளிர்கால கூட்டத் தொடர் நடத்த எந்த நடவடிக்கையும் எடுக்கப்படாமல் இருந்தது.
இந்நிலையில், டிசம்பர் 3ஆம் தேதி மக்களவை சபாநாயகர் ஓம் பிர்லாவுக்கு காங்கிரஸ் தலைவர் ஆதிர் ரஞ்சன் சவுத்ரி கடிதம் அனுப்பினார். அதில், விவசாயிகளின் போராட்டம், கரோனா தடுப்பூசி, சீன ஊடுருவல், பொருளாதார மந்தநிலை மற்றும் வேலையின்மை போன்ற நாட்டின் முக்கியப் பிரச்னைகள் குறித்து குளிர்கால கூட்டத்தொடரில் விவாதிக்க ஏதுவாக, குளிர்கால கூட்டத்தொடரை கூட்ட வேண்டும் என்று கோரியிருந்தார்.
காங்கிரஸ் தலைவர் ஆதிர் ரஞ்சன் சவுத்ரி, மக்களவை சபாநாயகர் ஓம் பிர்லாவிடம் விடுத்த கோரிக்கைக்கு, நாடாளுமன்ற விவகாரத்துறை அமைச்சர் பிரஹலாத் ஜோஷி கடிதம் மூலம் பதிலளித்துள்ளார்.
அதில், 'டெல்லியில் சமீப காலமாக கரோனா பாதிப்புகள் அதிகரித்துவருகிறது. கரோனா தொற்றுநோயால் ஏற்பட்டுள்ள சூழ்நிலைகளைக் கருத்தில்கொண்டு இந்த முறை நாடாளுமன்ற குளிர்கால கூட்டத்தொடர் ரத்து செய்யப்படுகிறது. நேரடியாக ஜனவரியில் பட்ஜெட் கூட்டத்தொடரை கூட்டலாம் என அனைத்துக் கட்சிகளும் விரும்புகின்றன' எனத் தெரிவித்துள்ளார்.
இதையும் படிங்க: உத்தரப் பிரதேசத்தில் களமிறங்கும் ஆம் ஆத்மி!
