வதோதரா: பாஜக மூத்த தலைவர் சுப்பிரமணியன் சுவாமியின் தடாலடியான கருத்துக்கள் பரபரப்பை ஏற்படுத்துவது வழக்கம். சமீபத்தில் தமிழ்நாடு வந்திருந்த அவர், தமிழ்நாட்டில் பாஜக இருக்கின்றதா என்றும், அண்ணாமலை யார் என்றும் கேள்வி எழுப்பி இருந்தார். இது அரசியல் வட்டாரத்தில் சலசலப்பை ஏற்படுத்தி இருந்தது.
இந்த நிலையில், பிரதமர் மோடி 2024 தேர்தலில் போட்டியிடக்கூடாது எனக் கூறி மீண்டும் சலசலப்பை ஏற்படுத்தி உள்ளார். வதோதராவில் உள்ள பாருல் பல்கலைக்கழகத்தில் சட்டக் கல்லூரி மாணவர்களிடம் பேசிய பிறகு செய்தியாளர்களிடம் பேசிய சுப்பிரமணியன் சுவாமி, “பொருளாதாரத்தை நிர்வகிப்பதில் மோடி தோல்வியடைந்துவிட்டார் என்று நான் நம்புகிறேன். அதனால் அவர் பிரதமர் போட்டியில் இருக்கக் கூடாது” என்றார்.
சீன விவகாரத்தில் பிரதமர் மோடியின் மௌனம் குறித்து கேள்வி எழுப்பிய அவர், அந்த நாடு ஆயிரக்கணக்கான கிலோ மீட்டர் இந்தியப் பகுதியை ஆக்கிரமித்துள்ளது, ஆனால் பிரதமர் அதன் பெயரைக் கூட உச்சரிக்கவில்லை என்றார். மேலும், “நம்முடைய சுமார் 4,024 சதுர கிலோ மீட்டர் நிலத்தை சீனா ஆக்கிரமித்துள்ளது. ஆனால், மோடி அமைதியாக இருக்கிறார். சுப்பிரமணியன் சுவாமி அப்படிச் சொன்னார் என்று அவரிடம் சொல்லுங்கள்.
மோடி தனது அமெரிக்கப் பயணத்தின்போது சீனாவைப் பற்றி ஒரு வார்த்தை கூட பைடனிடம் பேசாதது ஏன்? இது ஒன்றும் புதிதல்ல, இது நீண்ட நாட்களாக நடக்கிறது. மகாராஷ்டிராவில் உத்தவ் தாக்கரே தலைமையிலான சிவசேனாவுக்கு எதிராக கலகம் செய்த முதலமைச்சர் ஏக்நாத் ஷிண்டே மற்றும் அவரது எம்எல்ஏக்களை பாஜக விரைவில் நிராகரிக்கும்.
மோடி யாரையும் நீண்ட நேரம் வைத்திருப்பதில்லை. பாஜகவிற்கு இனி அவர்கள் தேவையில்லை. ஆட்சி அமைக்கத் தேவையான இடங்களை அவர்கள் தேசியவாத காங்கிரசில் ஏற்பட்ட பிரிவில் இருந்து பெற்றுள்ளனர். ஏக்நாத் ஷிண்டேவை அவர் விரைவில் திரும்ப அனுப்புவார்.
6 முறை நாடாளுமன்ற உறுப்பினராக இருந்த அவர், ராமர் பாலத்தை தேசிய பாரம்பரிய நினைவுச் சின்னமாக அறிவிக்காதது ஏன் என மத்திய அரசுக்கு கேள்வி எழுப்பினார். ராமர் பாலத்தை தேசிய புராதனச் சின்னமாக அறிவிப்பதில் அவர்களுக்கு என்ன பிரச்னை? அங்கு முஸ்லீம், கிறிஸ்தவர்கள் என்று யாரும் இல்லை. அடல் பிஹாரி வாஜ்பாய் ராமர் பாலத்தை பிரிக்க திட்டமிட்டார், நான் ராமர் பாலத்தை காப்பாற்றினேன்” என தெரிவித்தார்.
காங்கிரஸ் தலைவர் ராகுல் காந்திக்கு எதிரான மோடி பெயர் வழக்கு குறித்து பேசிய அவர், "அவதூறான கருத்துகளுக்காக ஒருவரை சிறையில் அடைப்பது என்பது பழைய நடைமுறை. இந்தியா தனது சட்டத்தை கடன் வாங்கிய இங்கிலாந்து கூட அதைச் செய்வதை நிறுத்திவிட்டது.
நீங்கள் ஒரு நபருக்கு அபராதம் விதிக்கலாம் அல்லது அவரது சொத்துக்களை பறிமுதல் செய்யலாம். ஆனால் அவதூறுக்காக ஒருவரை சிறையில் அடைப்பது இப்போது பழையதாகிவிட்டது. பிரதமர் அமெரிக்கா செல்வதற்குப் பதிலாக வன்முறையால் பாதிக்கப்பட்ட மணிப்பூர் மாநிலத்திற்குச் சென்று, அங்குள்ள மக்களுடன் பேச வேண்டும்" என கூறினார்.
