டெல்லி: பிரதமர் மோடியின் லட்சத்தீவு பயணம் குறித்த மாலத்தீவு அமைச்சர்களின் சர்ச்சை கருத்துக்கள் இரு நாடுகளிடையே அதிருப்தியை ஏற்படுத்தியுள்ளது. கடந்த 2ஆம் தேதி பிரதமர் மோடி இரண்டு நாள் பயணமாக லட்சத்தீவு சென்றிருந்தார். இந்த பயணத்தின் போது பிரதமர் மோடி லட்சத்தீவு மக்கள், அவர்களின் பழக்கவழக்கம், மற்றும் பாரம்பரியங்கள் குறித்து அவரின் அனுபவங்களைச் சமூகவலைத்தளத்தில் பகிர்ந்து கொண்டார்.
இந்தப் பயணத்தின் போது, "லட்சத்தீவுகள் வெறும் தீவுகளின் கூட்டமல்ல அது காலம் காலமாக நீடித்து இருக்கும் அம்மக்களின் பாரம்பரியம் என்றும், நீங்கள் சுவாரசியமிக்க மற்றும் நல்லதொரு பயண அனுபவத்தைப் பெறவிரும்புபவார்கள் ஆனால், அப்போது உங்கள் பயணப்பட்டியலில் லட்சத்தீவும் இடம்பெற வேண்டும்” என்று குறிப்பிட்டு மோடி அவரது பயணத்தின் புகைப்படங்கள் மற்றும் காணொலியை சமூக வலைத்தளங்களில் பகிர்ந்துகொண்டார்.
இந்த நிலையில், இந்தப் புகைப்படங்கள் சமூக வலைத்தளத்தில் வைரலானது. பலரும் இந்தப்புகைப்படங்களின் எழிலைக் கண்டு வியந்ததன் பலனாக, கூகுளில் அடுத்த இரண்டு நாட்களுக்கு மக்களின் அதிகப்படியான தேடல்களின் பட்டியலில் முதல் இடத்தைப்பிடித்திருந்தது. சிலர் சமூகவலைத்தளத்தில் லட்சத்தீவு மற்றும் மாலத்தீவு குறித்த புகைப்படங்களை இணைத்துப் பகிர்ந்தனர்.
என்னதான் சமூக வலைத்தள வாசிகள் மத்தியில் இந்த பதிவு வரவேற்பைப் பெற்றிருந்தாலும், இருநாடுகளின் கருத்து என்று பார்க்கும்போது மாலத்தீவு அமைச்சர்கள் பிரதமர் மோடியின் புகைப்படங்களுக்கு வெறுப்புக் கருத்துகளையே பதிவிட்டனர். மாலத்தீவின் இளைஞர் நல அமைச்சகத்தின் துணை அமைச்சராகப் பதவி வகித்து வரும் மரியம், பிரதமர் மோடி பப்பட்(puppet) என்றும் கோமாளி என்றும் விமர்சனம் செய்தார். இந்த விமர்சனங்கள் சமூகவலைத்தள வாசிகள் மத்தியில் கடும் எதிர்ப்புகளைப் பெற்றதையடுத்து அந்தப்பதிவு நீக்கப்பட்டது.
இதைத்தொடர்ந்து, மாலத்தீவு எம்பி ஷாகித் ரமீஸ், "லட்சத்தீவு பயணம் நல்ல முடிவு தான் என்றாலும், எங்களுடன் போட்டியிடும் எண்ணமானது மாயையானது. எங்கள் நாட்டின் சேவைகளை உங்களால் எவ்வாறு வழங்க முடியும்" என பதிவிட்டது எதிர்ப்பை வலுக்கச்செய்தது. இதைத்தொடர்ந்து மற்றொரு அமைச்சரான அப்துல்லா மஸ்சூம் மஜித், "இந்தியச் சுற்றுலாத்துறை வெற்றியடைய என்னுடைய வாழ்த்துக்கள். மாலத்தீவுகளுடன் வளம் மற்றும் கட்டமைப்புடன் போட்டியிடும் இந்தியா பல்வேறு இன்னல்களைச் சந்திக்கும். இதுவே உங்களின் கலாச்சாரம்" என ஒருமையில் கருத்து தெரிவித்துப் பதிவிட்டிருந்தார்.
இந்த கருத்துக்கள் இரு நாடுகளிடையே மோதல் போக்கை விரிவடையச் செய்தது. பல்வேறு பிரபலங்கள், அரசியல் தலைவர்கள், என சாமானிய மக்களின் கண்டனங்களுக்கு அச்சாரமிட்டது. ஏன் இது ஒரு படி மேல் சென்று, மாலத்தீவின் முன்னாள் அதிபர் முகமத் நஷீத், பிரதமர் மோடி குறித்து மரியம் ஷியுனாவின் இழிவான கருத்துக்களுக்குக் கண்டனம் தெரிவித்தார். "மாலத்தீவின் வளர்ச்சியில் ஒரு பங்காக இருக்கும் நட்பு நாடான இந்தியாவின் பிரதமர் குறித்து இவ்வாறு அதிகாரம் மற்றும் பொறுப்பில் இருக்கக்கூடிய மாலத்தீவின் அமைச்சர் மரியம் இழிவான கருத்துக்களைப் பதிவு செய்துள்ளார்.
இதுபோன்ற கருத்துக்களிலிருந்து பிரதமர் முய்சு விலகி இருக்க வேண்டும். மேலும் மரியமின் கருத்துக்கும் மாலத்தீவு அரசின் கொள்கை இல்லை என்று இந்தியாவுக்குத் தெளிவு படுத்த வேண்டும்" என அவரது சமூகவலைத்தளப் பக்கத்தில் இந்தியாவுக்கு ஆதரவளித்துப் பதிவிட்டிருந்தார்.
இது ஒருபுறம் இருக்க, மாலத்தீவு அமைச்சர்களின் இத்தகைய இழிவு கருத்திற்கு பல்வேறு தரப்பு கண்டனங்கள் வலுத்தாலும் சொந்த நாட்டில் இருக்கும் எதிர்க்கட்சிகளிடையே கண்டனங்கள் வலுத்தது. இதனிடையே மாலத்தீவு குறிப்பிட்ட சில அமைச்சர்களின் இத்தகைய கருத்திற்கு விளக்கம் கேட்டு, இந்திய அமைச்சகம் மாலத்தீவு தூதரகத்திற்கு அதிகாரப்பூர்வமாகக் கேள்வி எழுப்பியது.
இதனையடுத்து அந்நாட்டு அரசு இன்று வெளியிட்டுள்ள அறிக்கையில், "வெளிநாட்டுத் தலைவர்கள் மற்றும் மிகுந்த மதிப்புமிக்க பொறுப்புகள் வகித்து வருபவர்களைப் பற்றிய இழிவான கருத்து பகிர்தல் குறித்து கருத்தில் அரசு கவனம் செலுத்தியுள்ளது. சமூகவலைத்தளத்தில் பகிரப்பட்ட கருத்துக்கள் முற்றிலும் அவர்களின் தனிப்பட்ட கருத்தே. அரசு அந்த கருத்துக்களுக்கு ஒருபோது பொறுப்பேற்காது. அவை மாலத்தீவு அரசின் பிரதிபலிப்புகள் இல்லை.
பகிரப்படும் கருத்து கருத்துச் சுதந்திரத்துக்கு உட்பட்டவை தான். கருத்துச் சுதந்திரம் என்பது ஜனநாயக ரீதியிலும், பொறுப்பான முறையிலும், வெறுப்பு மற்றும் எதிர்மறை கருத்துக்களைப் பரப்பாத வகையிலும் சர்வதேச நட்பு நாடுகளின் உறவுகளைப் பாதிக்காத வகையில் இருக்க வேண்டும். மேலும் தற்போது பிரதமர் மோடி குறித்து மாலத்தீவு அமைச்சர்களின் இழிவான கருத்துக்கு அவர்களைத் தண்டிப்பதற்கு மாலத்தீவு அரசு தயக்கம் காட்டாது" என்று தெரிவித்து வெளியிட்டு இழிவு மற்றும் வெறுப்புக் கருத்துக்களைப் பகிர்ந்த மூன்று அமைச்சர்களான மல்ஷா ஷரீப், மரியம் ஷியூனா மற்றும் அப்துல்லா மஹ்சூம் மஜித் ஆகியோர் இடைநீக்கம் செய்து உத்தரவிட்டது.
மாலத்தீவு உடனான முன் பகை: முன்னதாக இந்தியா மற்றும் மாலத்தீவு இடையே சுமுகமான நட்புறவு நீடித்திருந்தது. இந்நிலையில் கடந்த நவம்பர் மாதம் முகமது முய்சு மாலத்தீவின் பிரதமராகப் பதவியேற்ற நிலையில், இரு நாடுகளிடையே மோதல் போக்கு வெடித்தது. மாலத்தீவில் வெளிநாட்டு ராணுவம் (இந்திய ராணுவம்)இருக்கக்கூடாது. அப்படி இருக்கும் ராணுவங்களை வெளியேற்றுவேன் என தேர்தல் வாக்குறுதி மேற்கொண்டது இந்தியா உடனான விரிசலுக்கு அடித்தளமிட்டது.
அதைத்தொடர்ந்து இந்தியா மீனவர்கள் மீதான தாக்குதல் கூடுதல் விரிசலுக்கான காரணமாக அமைந்தது. கடந்தாண்டு டிசம்பர் மாதம் cop28 காலநிலைப் பேச்சுவார்த்தையின் போது, பிரதமர் மோடியைச் சந்தித்தார் முகமது முய்சு. அப்போது இருதரப்பு உறவுகளையும் மேம்படுத்தக் குழு அமைக்க இரு தலைவர்களும் ஒப்புக்கொண்டனர். முன்னதாக 77 இந்திய ராணுவ வீரர்களைத் திரும்பப்பெற கேட்டுக்கொண்டதையடுத்தும், இரு நாடுகளிடையே ஒப்பந்தங்கள் மறு பரிசீலனை செய்யப்பட்டது. ஆனால் இரு நாட்டின் உறவு சுமுகமாக இல்லாமல் நீடித்து வந்தது.
சீன அரசுடன் முகமது முய்சு நட்பு பாராட்டி வருவதே இந்த மோதல் போக்கிற்கான காரணமாக இருக்கலாம் என பலரும் யூகங்களைப் பகிர்ந்து வந்த நிலையில் இந்தக் கருத்துகளை உறுதிப்படுத்தும் வகையில் அவ்வப்போது முகமது முய்சுவின் செயல்களும் அமைகிறது.இந்நிலையில் சீன அதிபர் ஜி ஜின்பிங்கின் அழைப்பை ஏற்று முகமது முய்சு நாளை(ஜன.8) சீன அதிபரை ஜி ஜின்பிங்கை சந்திக்கவிருக்கிறார் என்பது குறிப்பிடத்தக்கது.
இதையும் படிங்க: தமிழகத்தில் அதிகரிக்கும் கரோனா; ஒரே நாளில் 20 பேர் பாதிப்பு..
