சிரோஹி: ராஜஸ்தான் மாநிலம், சிரோஹி மாவட்டத்தில், கடந்த 9ஆம் தேதி 4 கொள்ளையர்கள், இரவு நேரத்தில் திருடுவதற்காக ஒரு வீட்டிற்குள் சென்றுள்ளனர். அங்கிருந்த வெள்ளிப்பொருட்கள், 1400 ரூபாய் பணத்தைத் திருடியுள்ளனர்.
அப்போது, ஒரு அறையில் கணவன், மனைவி உறங்கிக்கொண்டிருந்ததைக் கண்டனர். குடிபோதையில் இருந்த நால்வரும், கணவன் கண்முன்னே மனைவியை கூட்டுப்பாலியல் வன்கொடுமை செய்துள்ளனர். இதுகுறித்து வெளியே சொல்லக்கூடாது என இருவரையும் மிரட்டிவிட்டு, அங்கிருந்து தப்பியோடிவிட்டனர்.
இதையடுத்து பாதிக்கப்பட்ட கணவன் மனைவி இருவரும், இரண்டு நாட்களாக வீட்டை விட்டு வெளியே வராமல் இருந்துள்ளனர். திருட்டுச்சம்பவம் குறித்து அக்கம்பக்கத்தினர் தகவல் தெரிவித்ததன்பேரில் சம்பவ இடத்திற்குச் சென்ற போலீசார், விசாரணை நடத்தினர். முதலில் திருட்டுச்சம்பவம் குறித்து மட்டுமே தெரிவித்துள்ளனர். பின்னர் அவர்களது முகத்தைப் பார்த்து சந்தேகமடைந்த போலீசார், மீண்டும் அழுத்தமாக கேட்டபோது பாலியல் வன்கொடுமை குறித்து தெரிவித்துள்ளனர்.
இருட்டாக இருந்ததால் திருடர்களின் முகத்தைப் பார்க்க முடியவில்லை என்றும், சிகரெட் பிடிக்க தீக்குச்சியை பற்ற வைத்தபோது ஒரு திருடனின் முகத்தை மட்டும் பார்த்ததாகவும் பாதிக்கப்பட்ட பெண்மணி தெரிவித்துள்ளார். அந்த திருடன் கண்ணில் வெள்ளை நிறப்புள்ளி இருந்ததாகவும் தெரிவித்துள்ளார்.
இந்த அடையாளத்தை வைத்து ஒரு திருடனை கண்டுபிடித்த போலீசார், அவன் கொடுத்த தகவல்படி மேலும் இருவரையும் கைது செய்தனர். தலைமறைவாக உள்ள மற்றொரு திருடனை தேடும் பணி நடைபெற்று வருகிறது.
இவர்கள் நான்கு பேரும், ஏற்கெனவே புஜேலா, சரூப்கஞ்ச் உள்ளிட்ட இடங்களில் கொள்ளையடித்துள்ளனர். ரோஹிடா மற்றும் சரூப்கஞ்ச் காவல் நிலையங்களில் இவர்கள் மீது பல குற்ற வழக்குகள் பதிவு செய்யப்பட்டுள்ளன. இவர்கள் மிகவும் ஆபத்தானவர்கள் என போலீசார் தெரிவித்தனர்.
இதையும் படிங்க: சிறுமிக்கு பாலியல் தொல்லை - பள்ளி முதல்வர் கைது..!
