டெல்லி: பொருளாதாரத்தில் பின் தங்கிய முன்னேறிய வகுப்பினருக்கு 10 சதவீத இட ஒதுக்கீடு வழங்கும் சட்ட மசோதாவை கடந்த 2019ஆம் ஆண்டு நாடாளுமன்றத்தில் பாஜக நிறைவேற்றியது. நாடு முழுவதும் கடும் எதிர்ப்பு கிளம்பிய நிலையில், மசோதாவை எதிர்த்து பல்வேறு தரப்பினர் உச்ச நீதிமன்றத்தில் மனுத் தாக்கல் செய்தனர்.
உச்ச நீதிமன்ற தலைமை நீதிபதி யு.யு.லலித் தலைமையிலான 5 நீதிபதிகள் கொண்ட அமர்வு மனுக்களை விசாரித்தது. மசோதாவுக்கு 3 நீதிபதிகள் ஆதரவு தெரிவித்த நிலையில் இரு நீதிபதிகள் எதிர்ப்புத் தெரிவித்தனர். இந்நிலையில் கடந்த நவம்பர் 7ஆம் தேதி இட ஒதுக்கீட்டுக்கு ஒப்புதல் அளித்து உச்ச நீதிமன்றம் உத்தரவிட்டது.
இந்நிலையில் கடந்த சில நாட்களுக்கு முன் 10 சதவீத இடஒதுக்கீட்டில் உச்ச நீதிமன்றத்தின் தீர்ப்பை எதிர்த்து மறுசீராய்வு மனு தாக்கல் செய்ய திமுக தலைமையிலான அனைத்து கட்சிக் கூட்டத்தில் தீர்மானம் நிறைவேற்றப்பட்டது.
இதையடுத்து உச்ச நீதிமன்ற தீர்ப்பை எதிர்த்து திமுக சார்பில் மறுசீராய்வு மனு தாக்கல் செய்யப்பட்டது. சீராய்வு மனுவில் 10 சதவீத இட ஒதுக்கீடு 133 கோடி மக்களுக்கு எதிராக உள்ளதாகத் தெரிவிக்கப்பட்டுள்ளது.
மேலும் குறிப்பிட்ட சிலர் பொருளாதாரத்தில் நலிந்த வகுப்பினர் என்ற முகமூடிக்குள் மறைந்து கொள்ள அரசியலமைப்பு வழிவகை செய்வதாக கூறப்பட்டுள்ளது. நீதிபதி அறையில் பொது சீராய்வு மனுக்கள் மீதான விசாரணை நடைபெறும் நிலையில் இந்த வழக்கை திறந்த வெளியில் விசாரிக்க வேண்டுமென திமுக தாக்கல் செய்த மனுவில் தெரிவிக்கப்பட்டுள்ளது.
பொருளாதாரத்தில் பின் தங்கியவர்களுக்கு இட ஒதுக்கீடு வழங்கும் 103-வது அரசியலமைப்பு சட்டத் திருத்தம் அரசியல் சாசனம் வழங்கியுள்ள அடிப்படை விதிகளையும், நெறிமுறைகளையும் மீறும் வகையில் இருப்பதாகத் தெரிவிக்கப்பட்டுள்ளது.
இட ஒதுக்கீடு ஒப்புதல் ஏற்கெனவே இடஒதுக்கீடு பெற்று வரும் எஸ்.சி, எஸ்.டி மற்றும் ஓ.பி.சி. பிரிவினர்களிடையே பாகுபாட்டை உருவாக்கும் வகையில் இருப்பதாகவும் கூடிய விரைவில் மனு மீதான விசாரணையைத் துவக்க வேண்டும் எனவும் திமுகவின் மனுவில் தெரிவிக்கப்பட்டுள்ளது.
இதையும் படிங்க:Watch: மண் சரிவில் இருந்து தப்பிய பயணிகள் - திக்.. திக்.. வீடியோ
