மும்பை: இந்தியாவில் தற்போது கரோனா தொற்றின் இரண்டாம் அலை தனது கோர முகத்தை காட்டத் தொடங்கியுள்ளது. இது மகாராஷ்டிரா மாநிலத்தில் தீவிர பாதிப்பை ஏற்படுத்திவருகிறது.
அங்கு கரோனா தொற்றால் பாதிக்கப்பட்டவர்களின் நிலை மிகவும் மோசமான நிலைக்குத் தள்ளப்பட்டுள்ளது. அவர்களுக்குத் தேவையான மருத்துவ உபகரணங்களுக்கும் தற்போது தட்டுப்பாடு ஏற்படும் சூழல் உருவாகியுள்ளது.
இதையடுத்து, நாடு முழுவதும் ஆக்சிஜன் தேவையைப் பூர்த்திசெய்யும் வகையில் சிறப்பு சரக்கு ரயில்கள் இயக்கப்படுகின்றன. மத்திய ரயில்வே மூலம் அறிமுகப்படுத்தியுள்ள ஆக்சிஜன் எக்ஸ்பிரஸ் என்ற டேங்கர் ரயிலானது ஏழு காலி டேங்கர்களுடன் மும்பையிலிருந்து ஆந்திர மாநிலம் விசாகப்பட்டினத்திற்கு விரைந்தது.
இதைத் தொடர்ந்து, இன்று காலை 8 மணியளவில் விசாகப்பட்டினத்தில் அனைத்து டேங்கர்களும் ஆக்சிஜன் நிரப்பப்பட்டு மீண்டும் மகாராஷ்டிர மாநிலத்திற்குப் புறப்பட்டது.
'ஆக்ஸிஜன் எக்ஸ்பிரஸ்' ரயில்களை விரைவாகத் தேவை ஏற்படும் பகுதிகளுக்கு கொண்டுசெல்ல ஏதுவாக மத்திய அரசு பசுமை தாழ்வாரத்தை உருவாக்கிவருகிறது என ரயில்வே அமைச்சர் பியூஷ் கோயல் முன்னதாகத் தெரிவித்திருந்தார்.
திரவ ஆக்ஸிஜனைக் கொண்டுசெல்வதற்கு, 3.3 மீட்டர் உயர டேங்கர்களைக் கொண்டுசெல்ல ராணுவ வாகனங்கள் பயன்படுத்தப்படும். இந்த ரயில்கள் இடையில் நிறுத்தப்படாது, இதனால் அவை விரைவாக தங்கள் இலக்கை அடைய முடியும் என்றும் அவர் கூறினார்.
