இயற்கை வழங்கிய அனைத்து சுற்றுச்சூழலையும் மனித குலம் அழித்து வருகிறது. இன்று பூமியில் காணப்படும் அனைத்து காலநிலை மாற்றங்களின் ஆணி வேர், மனிதகுலத்தின் இந்த நன்றியற்ற அணுகுமுறையில் உள்ளது. இந்தியா பல்வேறு காலநிலை மண்டலங்களைக் கொண்டுள்ளது. அதன் சாகுபடி நிலத்தில் 68 விழுக்காடு வறட்சியால் பாதிக்கப்படும் அபாயம் உள்ளதாகவும், 5 கோடி ஹெக்டேர் நிலம் வெள்ளத்தால் பாதிக்கப்படும் என்று விஞ்ஞானிகள் எச்சரித்திருந்தனர்.
அதிகரித்துவரும் இயற்கை பேரழிவுகளின் காரணமாக, நாட்டில் பல்வேறு சமூக-பொருளாதார நெருக்கடிகள் ஏற்படுகின்றன. மத்திய அரசின் அறிவியல் மற்றும் தொழில்நுட்பத் துறை, காலநிலை மாற்றங்களின் தாக்கத்தால் மோசமாக பாதிக்கப்படக்கூடிய பகுதிகளை பட்டியலிட்டு ஒரு அறிக்கையை வெளியிட்டுள்ளது.
அதன்படி, ஜார்கண்ட், மிசோரம், ஒடிசா, சத்தீஸ்கர், அசாம், பிகார், அருணாச்சல பிரதேசம் மற்றும் மேற்கு வங்கம் ஆகியவை காலநிலை மாற்றங்களால் மிகவும் பாதிக்கப்படக் கூடிய பகுதிகள் என்று அறிக்கை கூறுகிறது. பல மாநிலங்கள் நடுத்தர முதல் குறைந்த பாதிப்புக்கு உள்ளாகும் பகுதிகளாக உள்ளன. இயற்கை பேரழிவுகளிடமிருந்து எந்த மாநிலமும், மாவட்டமும் தப்ப முடியாது என்றாலும், மத்திய அறிக்கை சில மாநிலங்களுக்கு முன்கூட்டியே எடுக்க வேண்டிய முன்னெச்சரிக்கை நடவடிக்கைகளை பட்டியலிட்டுள்ளது.
புயல், வெள்ளம் மற்றும் வெப்ப அலைகள் ஆகியவற்றால் ஏற்படும் அழிவின் அடிப்படையில் தயாரிக்கப்படும் உலக காலநிலை இடர் குறியீட்டில் இந்தியா ஏழாவது இடத்தில் உள்ளது.
1901 மற்றும் 2018ஆம் ஆண்டுகளுக்கு இடையில் நாட்டின் சராசரி வெப்பநிலை 0.7 டிகிரி உயர்ந்துள்ளது என்று உள்நாட்டு ஆய்வுகள் தெரிவிக்கின்றன. மாசு உமிழ்வுகளை கட்டுப்பாட்டுக்குள் கொண்டுவரவில்லை என்றால், 2040 மற்றும் 2069ஆம் ஆண்டுக்கு இடையில் நாட்டில் வெப்பநிலை இரண்டு டிகிரி வரை அதிகரிக்கும். இந்தப் பின்னணியில், இயற்கை பேரழிவுகளிலிருந்து குடிமக்களைப் பாதுகாக்கும் ஒரு செயல் திட்டம் உடனடியாக அமல்படுத்தப்பட வேண்டும்.
புவியியல் பரப்பளவில் இந்தியா உலகில் ஏழாவது இடத்தில் உள்ளது. ஆனால், விரைவில் சீனாவை முந்தி உலகின் அதிக மக்கள் தொகை கொண்ட நாடாக மாறப்போகிறது இந்தியா.
இந்த சூழ்நிலையில், காலநிலை மாற்றங்களால் வெள்ளம் மற்றும் வறட்சி ஏற்பட்டால், அது மக்களின் உணவுப் பாதுகாப்பிற்கு ஆபத்தாக முடியும். வடகிழக்கு இந்தியாவில் வறட்சி அடிக்கடி ஏற்படும், எதிர்காலத்தில் வட இந்தியாவில் மழையே இருக்காது என்று உலக வங்கி கணிப்புகள் கூறுகின்றன.
இதே அறிக்கை 2030ஆம் ஆண்டில் இந்தியாவில் விவசாயத் துறை 700 கோடி அமெரிக்க டாலர் இழப்பை சந்திக்கும் என்றும் 10 விழுக்காடு மக்களின் வருமானம் பெரிதும் குறைந்துவிடும் என்றும் எச்சரிக்கிறது. இருந்தாலும், பேரழிவுகளை எதிர்கொள்வதற்கு முறையான கொள்கைகளை பின்பற்றினால் இந்த இழப்பில் 80 விழுக்காடுவரை தடுக்க முடியும்.
காலநிலை மாற்றங்கள் குறித்த தேசிய செயல் திட்டம் 2008ஆம் ஆண்டு நடைமுறைக்கு வந்தது. இந்தத் திட்டத்தின் கீழ், நீர் மற்றும் விவசாயம் உள்ளிட்ட எட்டு துறைகளில், மாற்றங்களை அடைய திட்டமிடப்பட்டது. இருப்பினும், இன்றுவரை அதில் எந்தவிதமான முன்னேற்றமும் ஏற்படவில்லை.
பயிர்கள், நீர் பாதுகாப்பு, நிலத்தடி நீர் பயன்பாட்டின் மீதான கட்டுப்பாடு மற்றும் சொட்டு நீர் பாசனம் போன்ற புதிய தொழில்நுட்பங்களை பின்பற்றுவது குறித்தும் கவனம் செலுத்த வேண்டும். கடலோரப் பகுதிகளை பாதுகாக்கத் தேவையான அடிப்படை உள்கட்டமைப்புகளை உருவாக்குவதன் மூலமும், சரியான சுகாதார பாதுகாப்பு முறைகளை மேற்கொள்வதன் மூலமும் மட்டுமே நாம் பேரழிவுகளை திறம்பட எதிர்கொள்ள முடியும்.
