ஹைதராபாத்: பாரத் ராஷ்டிரிய சமிதி கட்சியின் தலைவரும், தெலங்கானா மாநில முதலமைச்சருமான சந்திரசேகர ராவ், நாளை (ஜூன் 26) மற்றும் நாளை மறுநாள் என இரண்டு நாள் சுற்றுப் பயணமாக மகாராஷ்டிரா செல்ல உள்ளார். நாளை காலை அங்கு செல்லும் சந்திரசேகர ராவ், பந்தாரிபூர் மற்றும் துல்ஜபூர் ஆகிய கோயிகளில் நடைபெறும் பூஜைகளில் கலந்து கொள்கிறார்.
இதற்காக நாளை காலை 10 மணிக்கு ஹைதராபாத்தில் இருந்து புறப்படுகிறார். பின்னர், சோலாபூரில் இருந்து சாலை மார்க்கமாக பந்தார்பூர் மற்றும் துல்ஜபூர் ஆகிய இடங்களுக்குச் செல்கிறார். இவ்வாறு செல்லும்போது அவர் உடன் மற்ற அமைச்சர்கள், சட்டமன்ற உறுப்பினர்கள் உள்பட மக்கள் பிரதிநிதிகள் மிகப்பெரிய கான்வாய் பேரணியாக செல்ல இருக்கின்றனர்.
மேலும், கிடைக்கப் பெற்ற ஆதாரங்களின் அடிப்படையில், 400 கார்களின் அணிவகுப்பில் கேசிஆர் செல்ல உள்ளதாக தகவல் வெளியாகி உள்ளது. பின்னர், சாலை மார்க்கமாக நாளை மாலை சோலாப்பூரை அடைந்து, அன்று இரவு அங்கேயே தங்குகிறார். அப்போது, பாகிராத் பால்கே உள்பட பல முக்கிய தலைவர்கள் சந்திரசேகர ராவ் முன்னிலையில் தங்களை பாரத் ராஷ்டிரிய சமிதி கட்சி உடன் இணைத்துக் கொள்ள உள்ளனர் என தகவல் கிடைத்து உள்ளது.
அது மட்டுமல்லாமல், கைத்தறி வேலைகளைப் பார்வையிடச் செல்லும் கேசிஆர் உடன் மகாராஷ்டிராவின் முக்கிய அரசியல் தலைவர்கள் மற்றும் தெலங்கானாவைச் சேர்ந்த கைத்தறி பணியாளர்கள் செல்ல உள்ளனர். இதனையடுத்து, நாளை மறுநாள் சோலாப்பூர் மாவட்டத்தின் பந்தர்பூரில் உள்ள வித்தல் ருக்மணி கோயிலுக்குச் செல்கிறார்.
தொடர்ந்து, தாரசிவ் மாவட்டத்தில் உள்ள துல்ஜபவானி தேவி கோயிலுக்குச் சென்று, அங்கு நடைபெறும் சிறப்பு பூஜையில் கலந்து கொள்கிறார். இதனையடுத்து, மீண்டும் ஹைதராபாத்துக்கு புறப்பட்டு வருகிறார். மேலும், வருகிற மக்களவைத் தேர்தலைத் தொடர்ந்து சட்டப்பேரவைத் தேர்தல், அதனையடுத்து உள்ளாட்சித் தேர்தல் என அனைத்தையும் வைத்தே இந்த பயணம் உள்ளதாக தெரிகிறது.
அதிலும், மகாராஷ்டிராவில் பயணம் மேற்கொள்வதன் மூலம், தனது பிஆர்எஸ் கட்சியை தேசிய அளவில் எடுத்துச் செல்வதற்கான முயற்சிகளில் கேசிஆர் இறங்கி உள்ளதாக அரசியல் வட்டாரங்கள் தெரிவிகின்றன. அதேநேரம், மகாராஷ்டிராவில் பாஜக - சிவசேனா இடையேயான மோதல்கள் உள்பட பல அரசியல் நகர்வுகளை மையமாக வைத்தே இந்த பயணம் முக்கியத்துவம் பெறுவதாக அமைந்து உள்ளது.
முன்னதாக, பாரத் ராஷ்டிரிய சமிதி கட்சியின் தலைவர் சந்திரசேகர ராவ், பாஜக, காங்கிரஸ் உள்ளிட்ட தேசிய கட்சிகளுக்கு பல இடங்களில் தனது மறுப்பை தெரியப்படுத்துவது மட்டுமல்லாது, தேசிய அளவில் 3வது அணியை உருவாக்குவதில் முனைப்பு காட்டி வருகிறார் என்பதே அரசியல் விமர்சகர்களின் கருத்தாக இருக்கிறது.
இதையும் படிங்க: மணிப்பூர் கலவரம் : மத்திய அரசின் தோல்வியே மணிப்பூர் கலவரத்திற்கு காரணம் - திருச்சி சிவா!
