ஹைதராபாத்தைச் சேர்ந்த பெண் மருத்துவர் பாலியல் வன்புணர்வு செய்யப்பட்டு கொல்லப்பட்ட சம்பவத்தைத் தொடர்ந்து நாடு முழுவதும் போராட்டம் வெடித்தது. இதையடுத்து, தமிழ்நாட்டைச் சேர்ந்த காவல் துறை பெண்களைப் பாதுகாக்கும் நோக்கில் பல நடவடிக்கைகளை எடுத்துவருகிறது.
தமிழ்நாடு பெண்கள் பாதுகாப்பு குறித்த சில புள்ளவிவரங்களைக் கீழே காண்போம்.
2016ஆம் ஆண்டு மட்டும் பெண்களுக்கு எதிராக 4463 குற்றங்கள் நடந்திருப்பதாக தேசிய குற்ற ஆவண காப்பகம் வெளியிட்ட அறிக்கையில் தெரிவிக்கப்பட்டுள்ளது. 2017ஆம் ஆண்டு, 5397 குற்றங்கள் நடந்திருப்பதாக அதில் கூறப்பட்டுள்ளது. ஒரே ஆண்டில் 934 குற்றங்கள் அதிகரித்துள்ளன.
நேதா செயலி
நேதா செயலி மூலம் எடுக்கப்பட்ட கணக்கெடுப்பு நவம்பர் 20ஆம் தேதி வெளியிடப்பட்டது. பாதுகாப்பாக இல்லை என 26 விழுக்காடு பெண்கள் கணக்கெடுப்பில் தெரிவித்துள்ளனர். 22 மாநிலங்களில் லட்சம் பெண்களிடம் கணக்கெடுப்பு எடுக்கப்பட்டுள்ளது. சென்னையில் எடுக்கப்பட்ட கணக்கெடுப்பில் 38 விழுக்காடு பெண்கள், தங்களின் பாதுகாப்பு சமரசமாக்கப்பட்ட நிகழ்வு நடந்துள்ளதாகத் தெரிவித்துள்ளனர்.
பாலியல் வன்கொடுமை ஆய்வறிக்கை
குற்றங்கள் குறித்து ஆராய்ச்சி செய்யும் மங்கை நடராஜன், பாலியல் வன்கொடுமை குறித்து ஆய்வறிக்கை ஒன்றை வெளியிட்டுள்ளார். பெண்களுக்கு எதிராகத் தொடுக்கப்படும் பாலியல் ரீதியான சீண்டல்கள் மாலை நேரங்களில்தான் அதிக அளவில் நடப்பதாக அவர் தெரிவித்துள்ளார். "பெண்கள் தனியாக பணிக்குச் செல்லும்போதும் பேருந்து நிலையங்கள், ரயில்வே நிலையங்கள் ஆகிய இடங்களில் அவர்கள் நிற்கும்போதும் பாலியல் ரீதியான வன்கொடுமைகள் நடைபெறுகின்றன" என ஆய்வறிக்கையில் தெரிவிக்கப்பட்டுள்ளது.
நுங்கம்பாக்கம் ரயில்வே நிலையத்தில் மூன்றாண்டுகளுக்கு முன்பு சுவாதி என்ற பெண் படுகொலை செய்யப்பட்டார். பொது போக்குவரத்தை தேர்ந்தெடுக்கும் பெண்களுக்கு எதிராகத் தொடர்ந்து பாலியல் வன்கொடுமை சம்பவங்கள் நடைபெற்றுவருகின்றன.
2017ஆம் ஆண்டு, சென்னையைச் சேர்ந்த 1500 பெண்களிடம் சிட்டி என்ற அரசு சாரா அமைப்பு கணக்கெடுப்பு எடுத்தது. அரசுப் பேருந்துகளில் பயணிக்கும்போதுதான் பெரும்பாலான பாலியல் வன்கொடுமை சம்பவங்களை சந்திப்பதாக 70 விழுக்காடு பெண்கள் தெரிவித்துள்ளனர். ரயில், ஆட்டோ, ஷேர் ஆட்டோ ஆகியவற்றில் பயணிக்கும்போதும் பாலியல் வன்கொடுகள் நிகழ்த்தப்படுவதாக பெண்கள் கருத்து தெரிவித்துள்ளனர்.
பெண்களின் பாதுகாப்பு?
- 2017ஆம் ஆண்டு, கல்லூரி வளாகங்களில் பாலியல் வன்கொடுமை சம்பவங்கள் 50 விழுக்காடு அதிகரித்துள்ளதாக மனிதவள மேம்பாட்டு அமைச்சகம் தெரிவித்துள்ளது.
- 2015ஆம் ஆண்டு, பள்ளிகளில் சிசிடிவி கேமராக்கள் பொருத்தப்படுவது கட்டாயமாக்கப்படுகிறது என மாநில கல்வித் துறை சார்பில் உத்தரவு பிறப்பிக்கப்பட்டது. தனியார் பள்ளிகள் இதனை நிறைவேற்றியபோதிலும் அரசுப் பள்ளிகள் இதனை மேற்கொள்ளவில்லை.
- 2019ஆம் ஆண்டு, தமிழ்நாடு முழுவதும் உள்ள 2,894 பள்ளிகளில் 21.71 கோடி ரூபாய் செலவில் சிசிடிவி பொருத்தப்படும் என அரசு அறிவித்திருந்தது. ஆனால், இந்தத் திட்டம் இன்னும் செயல்படுத்தப்படவில்லை.
நிர்பயா நிதி
- 2013ஆம் ஆண்டு டெல்லியில் கூட்டு பாலியல் வன்புணர்வுக்கு உள்ளாக்கப்பட்ட பெண்ணை நினைவுகூரும் வகையில் நிர்பயா நிதி உருவாக்கப்பட்டது.
- ஒவ்வொரு ஆண்டும் மத்திய அரசு 1000 கோடி ரூபாய் நிதியை பெண்களின் பாதுகாப்புக்காக மாநில அரசுகளுக்கு ஒதுக்குகிறது.
- இதுவரை, 190.68 கோடி ரூபாய் நிதியை தமிழ்நாடு பெற்றுள்ளது. ஆனால், ஆறு கோடி ரூபாய் நிதியை மட்டுமே பயன்படுத்தியுள்ளது.
மாநில அரசுகள் விடுத்த கோரிக்கை
- பேருந்து நிலையம், ரயில் நிலையம் ஆகிய இடங்களில் சிசிடிவி கேமரா பொருத்த வேண்டும்.
- அரசுப் பேருந்துகளில் அவசர பொத்தானை இணைக்க வேண்டும்.
- பெண்கள் காவல் நிலையத்தை பலப்படுத்த நடவடிக்கை எடுக்க வேண்டும்.
- குற்றம் அதிகம் நடக்கும் இடங்களைக் கண்டறிந்து, அவசர அழைப்பு சேவைக்கான நிலையங்களை அங்கு தொடங்க வேண்டும்.
- பெண்களுக்காக 500 மின்னணு கழிவறைகளை பொது இடங்களில் அமைக்க வேண்டும்.
- 7,000 எல்இடி தெருவிளக்குகளைப் பொருத்த வேண்டும்.
செயல்படுத்தப்பட்ட திட்டங்கள்
- பெண்கள் அவசர உதவி எண் 181
- அனைத்து காவல் நிலையங்களுக்கும் அம்மா ரோந்து வாகனம்.
- காவலன் செயலி
பெண்களுக்கான உதவி எண்களை தமிழ்நாடு முதலமைச்சர் டிசம்பர் 10ஆம் தேதி 2018ஆம் ஆண்டு தொடங்கிவைத்தார். இதற்காக 51.51 லட்சம் ரூபாய் செலவிடப்பட்டது.
உடல், மன, பாலியல், உணர்வு ரீதியாக பாதிக்கப்பட்ட பெண்களுக்கு உதவும் நோக்கில் 24 மணி நேர சேவை தொடங்கப்பட்டது. குஜராத் உள்ளிட்ட மாநிலங்களில் இதுபோன்ற சேவை ஏற்கனவே உள்ளது.
இதன் அலுவலகம் சென்னை அம்பத்தூரில் உள்ளது. ஐந்து வழக்கறிஞர்கள், ஐந்து உளவியல் நிபுணர்கள், ஒரு தகவல் தொழில்நுட்ப நிபுணர் ஆகியோர் பெண்களுக்கு ஆலோசனை வழங்குகின்றனர்.
ஆண்கள் இந்த அவசர உதவி எண்களுக்கு தொடர்புகொண்டு பாடும்படி தொந்தரவு செய்வதாகத் தனியார் செய்தி நிறுவனம் செய்தி வெளியிட்டுள்ளது. இதுபோன்று, 45,000 போலி அழைப்புகள் வந்துள்ளதாகக் கூறப்படுகிறது.
உறவுகளுக்கு இடையே நடக்கும் வன்முறை, மதுப்பழக்கம், திருமண பந்தத்தை தாண்டிய உறவு, இணையங்கள் மூலம் நடக்கும் குற்றம், பாலியல் வன்கொடுமைகள் குறித்து 7,520 அழைப்புகள் வந்துள்ளன.
அரசு மேற்கொண்டுள்ள திட்டங்கள் குறித்து அழைப்பாளர்கள் கேள்வி கேற்கின்றனர். ஆனால், பெரும்பாலனவை போலி அழைப்புகளாக உள்ளது. நாளுக்கு குறைந்தபட்சம் 60 போலி அழைப்புகள் வருவதாகக் கூறப்படுகிறது.
அம்மா ரோந்து வாகனம்
நிர்பயா நிதியிலிருந்து 6.8 கோடி ரூபாய் எடுக்கப்பட்டு 40 புதிய வாகனங்கள் வாங்கப்பட்டுள்ளன. பெண்கள், பெண் குழந்தைகளுக்கு எதிராக நடக்கும் குற்றங்களுக்கு அம்மா ரோந்து வாகனம் மூலம் உடனடி நடவடிக்கை எடுக்கப்படுகிறது.
காவலன் செயலி:
தொடர் விழிப்புணர்வு மூலம் நான்கு நாள்களில் ஒரு லட்சம் பேர் காவலன் செயலியை பதிவிறக்கம் செய்ததாக சென்னை காவல் ஆணையர் ஏ.கே. விஸ்வநாதன் தெரிவித்துள்ளார்.
பெண்கள் பாதுகாப்புக்காக...
குழந்தைகளுக்கு எதிராக நடக்கும் வன்முறைகளைத் தடுப்பதற்கு யுனிசெஃப் அமைப்பு சில ஆலோசனைகளை வழங்கியுள்ளது.
- குழந்தைகளுக்கு எதிராக நடக்கும் வன்முறைகளைத் தடுப்பதற்கு பெற்றோர், காப்பாளர்கள், குழந்தைகள் நல வாரியங்கள் ஆகியவையுடன் இணைந்து செயல்பட வேண்டும்.
மற்ற நாடுகளில்...
- இரவு 9 மணியிலிருந்து காலை 5 மணி வரையிலான காலகட்டத்தில் பேருந்தில் செல்லும் பெண்களின் பாதுகாப்பை பலப்படுத்தும் வகையில், அனைத்து பேருந்து நிறுத்தங்களுக்கு இடையேயும் காவல் கண்காணிப்பு நடவடிக்கையை டொரண்டோ போக்குவரத்து ஆணையம் கனடாவில் மேற்கொண்டுவருகிறது.
- லண்டனில் காவலர்களிடம் புகார் அளிப்பதை ஊக்குவிப்பதற்காக கார்டியன் என்ற அமைப்பு காவல் துறையுடன் சேர்ந்து விழிப்புணர்வு நிகழ்ச்சி நடத்திவருகிறது. பொது போக்குவரத்து வாகனங்களில் நடக்கும் பாலியல் வன்கொடுமை குறித்த வழக்குகளை எதிர்கொள்ள காவல் துறையினருக்கும் போக்குவரத்து துறையினருக்கு சிறப்புப் பயிற்சி அளிக்கப்படுகிறது.