பிகார் சட்டப்பேரவைத் தேர்தல் மூன்று கட்டங்களாக நடைபெற்று நவம்பர் 7ஆம் தேதி முடிவுற்றது. நிதிஷ் குமாரின் ஐக்கிய ஜனதா தளம்-பாஜக கூட்டணியை எதிர்த்து லாலு பிரசாத் யாதவ்வின் மகன் தேஜஸ்வி யாதவ் தலைமையிலான ராஷ்டிரிய ஜனதா தளம்-காங்கிரஸ்-இடதுசாரிகள் மெகா கூட்டணி களம் கண்டுள்ளது.
இச்சூழலில் தேர்தலுக்குப் பிந்தைய கருத்துக்கணிப்புகளில் பெரும்பாலானவை பிகாரில் இரு கூட்டணிக்கும் பெரும்பான்மை கிடைக்காமல் தொங்கு சட்டப்பேரவைதான் அமையும் என்று கூறியுள்ளன. இதனால் இரு கூட்டணிகளுக்கும் ஆட்சி அமைக்க சிறிய கட்சிகளின் ஆதரவு தேவைப்படும் என்ற நிலை உருவாகியுள்ளது.
ஆனால், அதைவிட முக்கியப் பிரச்னையாக தங்களது கூட்டணிகளின் எம்எல்ஏக்களை பாதுகாப்பதில்தான் இரு அணிகளும் கவனம் செலுத்திவருகின்றன. குறிப்பாக இவ்விவகாரத்தில் காங்கிரஸ் கட்சிதான் அதீத விழிப்புணர்வுடன் செயல்பட்டுவருகிறது. கடந்த காலங்களில் மத்தியப் பிரதேசத்திலும் மணிப்பூரிலும் ஆட்சியைப் பறிகொடுத்தது போல் இருந்துவிடக் கூடாது என்பதே அக்கட்சி மிக மிகக் கவனத்துடன் செயலாற்றிவருகிறது.
