மகாராஷ்டிராவில் உத்தவ் தாக்கரே தலைமையிலான கூட்டணி ஆட்சி தற்போது நடைபெற்று வருகிறது. சிவசேனா தலைமையிலான கூட்டணியில் தேசியவாத காங்கிரஸ், காங்கிரஸ் ஆகிய கட்சிகள் அங்கம் வகிக்கின்றன. தேர்தலுக்கு முன் பாஜகவுடன் கூட்டணியில் இருந்த சிவசேனா, தேர்தலுக்குப்பின் ஏற்பட்ட அதிருப்தி காரணமாக கூட்டணியில் இருந்து விலகியது.
இதையடுத்து, இரு துருவங்கள் இணைந்து தற்போது கூட்டணி ஆட்சி நடத்திவரும் நிலையில், இக்கூட்டணியில் தற்போது சலசலப்பு உருவாகியுள்ளது. நேற்று டெல்லி சென்ற மகாராஷ்டிரா முதலமைச்சர் உத்தவ் தாக்கரே பிரதமர் மோடியைச் சந்தித்து பேச்சுவார்த்தை நடத்தினார்.
அதன்பின்னர் செய்தியாளர்களிடம் பேசிய உத்தவ், 'குடியுரிமை திருத்தச் சட்டம், என்.ஆர்.சி, என்.பி.ஆர் ஆகிய விவகாரங்களால் இந்தியாவில் வசிக்கும் சிறுபான்மையினருக்கு ஆபத்து இல்லை' என பிரதமர் கூறியதாகத் தெரிவித்தார்.
காங்கிரஸ் மேற்கண்ட நடவடிக்கைகளை கடுமையாக எதிர்த்துவரும் நிலையில், இதுபோன்ற கருத்தை கூட்டணிக்கட்சி தெரிவித்திருப்பது சர்ச்சையைக் கிளப்பியுள்ளது.
