டெல்லியில் கடந்த இரு நாள்களாக அரங்கேறிவரும் கலவரம் குறித்து காங்கிரஸ் கட்சியின் இடைக்காலத் தலைவர் சோனியா காந்தி செய்தியாளர்களைச் சந்தித்துப் பேசினார்.
அப்போது பேசிய அவர், ”டெல்லி வன்முறைக்குப் பின்னணியில் சதித்திட்டம் உள்ளது. தேர்தல் காலத்தின்போதே இது உணரப்பட்டது. பயத்தையும் வெறுப்பையும் தூண்டும் விதத்தில் பல்வேறு பாஜக தலைவர்கள் தொடர்ச்சியாகப் பேசிவந்துள்ளனர். டெல்லியின் தற்போதைய நிலைக்கு மத்திய அரசும் மத்திய உள்துறை அமைச்சரும்தான் பொறுப்பேற்க வேண்டும். மத்திய உள்துறை அமைச்சர் அமித் ஷா பதவி விலக வேண்டும்.
டெல்லி காவல் துறை செயலற்றுக் கிடக்கும் நிலையில், கடந்த 72 மணி நேரத்தில் 18க்கும் மேற்பட்டோர் உயிரிழந்துள்ளனர். நூற்றுக்கணக்கான மக்கள் படுகாயமடைந்துள்ளனர். வட கிழக்கு டெல்லியில் வன்முறை தொடர்ச்சியாக அரங்கேறிவருகிறது.
டெல்லி முதலமைச்சரும் டெல்லி அரசும் இதற்குச் சமமான பொறுப்பை ஏற்க வேண்டும். மக்களிடம் அமைதியையும் ஒற்றுமையையும் ஏற்படுத்த அவர்கள் தவறிவிட்டனர். மத்திய, மாநில அரசுகளின் தவறே தலைநகரை இத்தகைய துயரமான நிலைமைக்குத் தள்ளியுள்ளது’ என்றார்.
இந்தச் செய்தியாளர் சந்திப்பில் முன்னாள் பிரதமர் மன்மோகன் சிங், ஏ.கே. அந்தோனி, குலாம்நபி ஆசாத், ரந்தீப் சுர்ஜிவாலா ஆகியோர் உடனிருந்தனர். இதனிடையே குடியரசுத் தலைவர் மாளிகை நோக்கி காங்கிரஸ் பேரணி நடத்த குடியரசுத் தலைவரிடம் அனுமதி கோரியிருந்ததாகவும், இன்று அவர் டெல்லியில் இல்லை என்று தெரிவித்தால் நாளைக்கு ஒத்திவைத்துள்ளதாகவும் காங்கிரஸ் செய்தித் தொடர்பாளர் ரன்தீப் சுர்ஜிவாலா தெரிவித்தார்.
இதையும் படிங்க: 'வன்முறை வெறியாட்டத்திலிருந்து இந்தியா மீண்டுவர விழைகிறேன்' - கமல் ட்வீட்
