பல ஆண்டுகளாக நிலுவையிலிருந்த இந்த வழக்கின் மீதான விசாரணை உச்ச நீதிமன்ற தலைமை நீதிபதி எஸ்.ஏ.போப்டே முன் இன்று வந்தது. திமுக தரப்பில் மூத்த வழக்கறிஞர் கபில் சிபல் ஆஜரானார். அதேபோல், 11 எம்.ஏல்.க்கள் தரப்பில் மூத்த வழக்கறிஞர் முகுல் ரோத்தகி ஆஜரானார்.
இந்த வழக்கு விசாரணையின்போது ஆஜரான திமுக தரப்பு வழக்கறிஞர் கபில் சிபல், "11 அதிமுக எம்எல்ஏ-க்களை தகுதி நீக்கம் செய்ய வேண்டும் என்று நாங்கள் கோரவில்லை. தகுதி நீக்கம் செய்ய வேண்டும் என்று சபாநாயகருக்கு அளிக்கப்பட்ட கடித்தத்துக்கு அவர் எந்த பதிலும் சொல்லவில்லை. அதன்மீது அவர் முடிவு எடுக்க வேண்டும் என்பதே எங்கள் விருப்பம்" என்று வாதிட்டார்.
மேலும், இது தொடர்பாக சபாநாயகரிடம் 20.3.2017இல் மனு அளிக்கப்பட்டது என்ற கபில் சிபல், பல நேரங்களில் அரசுக்கு எதிராக அளிக்கப்படும் மனுக்களை சபாநாயகர் உடனே பரிசீலனை செய்வதில்லை என்றும் ஆனால், மனு எதிர்க்கட்சிகளுக்கு எதிரானது என்றால் மறுநாளே அதன்மீது நடவடிக்கை எடுக்கின்றனர் என்றும் கூறினார்.
"அட்டவணை 10இன்படி சபாநாயகர் என்பவர், உடனே மனுக்கள் மீது நடவடிக்கை எடுக்க வேண்டும். குறிப்பாக எம்எல்ஏ-க்களை தகுதிநீக்கம் செய்யக்கோரி அளிக்கப்படும் தீர்மானங்கள், கோரிக்கைகள் மீது மூன்று மாதங்களுக்கு மேலாக கண்டுகொள்ளாமல் இருப்பது மிகவும் அதிகமான காலம். இது தொடர்பாக மணிப்பூர் மாநில சபாநாயகருக்கு நீதியரசர் நாரிமன் அண்மையில் வழங்கிய உத்தரவினை கவனத்தில் கொள்ளவேண்டும்," என்று கபில் சிபல் வாதிட்டார்.
ஆனால், பன்னீர்செல்வம் தரப்பு வழக்கறிஞர் முகுல் ரோத்தகியோ கபில் சிபலின் வாதத்தை ஏற்க முடியாது என்று இடைமறித்தார். "மணிப்பூர் சபாநாயகர் வழக்கில் வழங்கப்பட்ட உத்தரவு இந்த வழக்குக்குப் பொருந்தாது," என ரோத்தகி வாதிட்டார். இதனைக் கேட்ட உச்ச நீதிமன்ற தலைமை நீதிபதி எஸ்.ஏ.போப்டே, இந்த வாதங்கள் மீது என்ன நடவடிக்கை எடுக்கவுள்ளீர்கள் என்று அரசு வழக்கறிஞரிடம் கேள்வி எழுப்பினார்.
"ஏற்கனவே இது தொடர்பாக தேர்தல் ஆணையத்திடம் அளிக்கப்பட்ட புகார் நிலுவையில் உள்ளது. மேலும், கலகம் செய்த 11 எம்.எல்.ஏ.க்கள் 21.08.2017 அன்று அரசு தரப்பு கட்சியுடன் இணைந்துள்ளனர். மேலும், தேர்தல் ஆணையம் மற்றும் உயர்நீதிமன்றத்தின் முன் இது தொடர்பான மனுக்கள் நிலுவையில் உள்ளதால் உடனடியாக சபாநாயகரால் நடவடிக்கை எடுக்க முடியவில்லை" என்று சபாநாயகர் தரப்பு வாதிட்டது.
ஆனால், இதனை ஏற்க முடியாது என்ற தலைமை நீதிபதி மூன்று வருடமாக ஒரு மனுவின் மீது எந்த நடவடிக்கையும் எடுக்காமல் இருப்பது எப்படி நியாயம் ஆகும் என்றார். இந்த சூழலில், அரசு தரப்பு வழக்கறிஞர் மனுவின் மீது பதிலளிக்க 2 வார கால அவகாசம் கேட்டார்.
"மூன்று ஆண்டுகளாக இந்த மனு மீது ஏன் நடவடிக்கை இல்லை என்று பிப்ரவரி 14-ம் தேதி பதில் அளிக்க வேண்டும்," என்று உச்ச நீதிமன்ற தலைமை நீதிபதி சபாநாயகருக்கு உத்தரவு பிறப்பித்தார்.
இதையும் படிங்க: 'நாட்டைவிட்டு வெளியேறுங்கள், இல்லையென்றால் வெளியேற்றப்படுவீர்கள்' - போஸ்டரால் கிளம்பும் புதிய சர்ச்சை
