சீனாவின் வூஹான் மாகாணத்தில் கடந்தாண்டு இறுதியில் கண்டறியப்பட்ட கோவிட்-19, தற்போது 190-க்கும் மேற்பட்ட நாடுகளைக் கடுமையாகப் பாதித்துள்ளது. இந்தத் தீநுண்மி தொற்றுக்குத் தடுப்பு மருந்தை உருவாக்க உலகிலுள்ள பல ஆய்வாளர்கள் ஆராய்ச்சியில் ஈடுபட்டுள்ளனர்.
இதேபோல கேரளா மாநிலம் கோட்டயத்திலுள்ள மகாத்மா பல்கலைக்கழக ஆராய்ச்சியாளர்கள் கோவிட்-19 தடுப்பு மருந்து குறித்தும், தொற்று பரவலைத் தடுக்கும் முறைகள் குறித்தும் ஆய்வுகளை மேற்கொண்டுவருகின்றனர்.
இந்த ஆராய்ச்சிகளுக்குத் தலைமை தாங்கும் பல்கலைக்கழகத்தின் துணைவேந்தர் சாபு தாமஸ் கூறுகையில், "மஞ்சளிலிருந்து பிரித்தெடுக்கப்பட்ட குர்குமின் என்ற பொருளைக்கொண்டு கோவிட்-19 பரவலைக் கட்டுப்படுத்த முடியும் என்று நாங்கள் நம்புகிறோம்.
குர்குமின், டைட்டானியம் டை ஆக்சைடு ஆகியவற்றுடன் வேறு சிலவற்றைச் சேர்த்து, அதைத் தனிப்பட்ட பாதுகாப்பு உபகரணங்களின் மேல் தெளிக்கலாம். இது தீநுண்மி பரவலைக் கட்டுப்படுத்தும் என்று நாங்கள் கருதுகிறோம்" என்றார்.
கோவிட்-19 தொற்றிலிருந்து குணமடைந்தவர்கள் உடலிலிருந்து எடுக்கப்பட்ட ஆன்டிபாடிகளைக் கொண்டு தீநுண்மி தொற்றுக்கு எதிரான தடுப்பு மருந்தைத் தயாரிப்பதிலும் ஆய்வுகளை மேற்கொண்டுவருவதாகக் குறிப்பிட்டார்.
இந்த ஆராய்ச்சிகள் நிறைவடை மூன்று ஆண்டுகள் வரை ஆகும் என்றும் இதற்கு மூன்று கோடி ரூபாய் செலவாகும் என்றும் அவர் கூறினார்.
கோவிட்-19 தொற்று காரணமாக உலகெங்கும் 34 லட்சத்து 84 ஆயிர்தது 483 பேர் பாதிக்கப்பட்டுள்ளனர். அவர்களில் இரண்டு லட்சத்து 44 ஆயிரத்து 780 பேர் உயிரிழந்துள்ளனர்.
இதையும் படிங்க: ஏழைகளுக்கு ஏழாயிரம் ரூபாய் நிதியுதவி வழங்க காங்கிரஸ் வலியுறுத்தல்!
