மேற்கு வங்க மாநிலத்தில் கரோனா பாதிப்பு குறித்தும் ஊரடங்கு தளர்வு குறித்தும் அம்மாநில முதலமைச்சர் மம்தா பானர்ஜி பேசினார். அப்பொழுது, "சட்டம் என்பது அனைவருக்கும் பொதுவானது என்னும்போது, ஏன் ரயில்களில் பயணிகள் குவிக்கப்பட்டு அவர்களது சொந்த ஊர்களுக்கு அனுப்பப்படுகின்றனர்?
இந்தியன் ரயில்வே நிர்வாகம் தகுந்த இடைவெளியை குடிபெயர் தொழிலாளர்கள் பயணிக்கும் ரயில்களில் மட்டும் ஏன் கடைப்பிடிக்கவில்லை, அவர்களுக்குத் தேவையான உணவுப்பொருள்கள், குடிநீரைக்கூட அளிக்க ஏன் மனம் வரவில்லை?
இந்தியன் ரயில்வே ஷ்ராமிக் சிறப்பு ரயில்களை இயக்குகிறதா அல்லது கரோனா அதிவிரைவு ரயில்களை இயக்குகிறதா? என எனக்குச் சந்தேகம் எழுகிறது. நானும் ஒருமுறை ரயில்வே அமைச்சராகப் பணியாற்றியுள்ளேன். அப்பொழுது மக்களின் தேவைகளுக்காக ரயில் பெட்டிகளின் எண்ணிக்கையை அதிகரித்துள்ளேன்.
ஆனால், இந்தப் பெருந்தொற்றின் காலத்திலும் மத்திய அரசு இதுபோன்ற நடவடிக்கைகளில் ஏன் அக்கறை காட்டுவதில்லை? ரயிலில் பயணிக்கும் அதிகப்படியான மக்கள் கரோனா தொற்றால் அதிகம் பாதிப்படைந்துள்ள பகுதிகளிலிருந்து சொந்த ஊர் திரும்புகின்றனர் என்பதை மத்திய அரசும், ரயில்வே நிர்வாகமும் கவனத்தில்கொள்ளட்டும்.
மாநிலத்தில் ஏற்பட்டுள்ள நெருக்கடிகளைச் சமாளிக்கும்பொருட்டு 50 லிருந்து 70 விழுக்காடு அரசு ஊழியர்கள் பணிக்குத் திரும்ப உத்தரவிடப்பட்டுள்ளது. மறுசீரமைப்புப் பணிகளைத் தொடங்க இது மிகுந்த உதவிபுரியும்.
அதேபோல, தனியார் நிறுவனங்களில் பணியாற்றும் ஊழியர்கள் தங்களின் பாதுகாப்பை உறுதிசெய்ய வேண்டும். முடிந்தளவு வீட்டிலிருந்தே பணிசெய்ய முயற்சிக்க வேண்டும்.
ஊரடங்கு சில தளர்வுகளுடன் தொடரும். சணல் ஆலைகளும், தேயிலைத் தோட்டங்களும் 100 விழுக்காடு பணியாளர்களுடன் இயங்கும். மக்கள் அனைவரும் இத்தகைய பேரிடர் காலங்களில் அரசிற்கு உதவ வேண்டும்.
மாநிலத்தில் ஜூன் 1ஆம் தேதிமுதல் மத வழிபாட்டுத் தலங்கள் அனைத்தும் திறக்கப்படவுள்ளது. அங்கு பத்து பேர் மட்டுமே அனுமதிக்கப்படுவர்" என்று தெரிவித்தார்.
இதையும் படிங்க: உயிரிழந்த தாயுடன் கண்ணாமூச்சி விளையாடும் குழந்தை!
