புதுச்சேரி மாநில அரசு நிர்வாகத்தில், துணைநிலை ஆளுநர் கிரண்பேடி தொடர்ந்து தலையிட்டு வருவதாகக்கூறி, ராஜ்பவன் தொகுதியின் காங்கிரஸ் சட்டப்பேரவை உறுப்பினர் லட்சுமி நாராயணன், சென்னை உயர் நீதிமன்றத்தில் ஏற்கனவே வழக்குத் தொடுத்திருந்தார். இதில், தீர்ப்பு வழங்கிய உயர் நீதிமன்றம், அமைச்சரவையின் முடிவுப்படியே ஆளுநர் செயல்படவேண்டும் எனத் தெரிவித்தது.
இந்நிலையில், அரசின் நடவடிக்கைகளில் குறிப்பாக, 30 பிரச்னைகளில் துணைநிலை ஆளுநர் கிரண்பேடி தலையிட்டதை சுட்டிக்காட்டியும், ஏன் இதன் மீது நீதிமன்றம் அவமதிப்பு நடவடிக்கை எடுக்கக்கூடாது எனக் கேட்டும், காங்கிரஸ் சட்டப்பேரவை உறுப்பினர் லட்சுமி நாராயணன் ராஜ் நிவாசுக்கு நோட்டீஸ் அனுப்பியுள்ளார்.
இதேபோன்று, தலைமைச் செயலாளர் அஸ்வின்குமார், ராஜ் நிவாஸ் சிறப்புப்பணி அதிகாரி தேவநீதிதாஸ், மீன்வளத்துறை செயலர் பூர்வகார்க், மாநகர போக்குவரத்துப் பிரிவின் முதுநிலை காவல் கண்காணிப்பாளர் ராகுல் அலுவால், இந்து அறநிலையத் துறை செயலர் மகேஷ் ஆகியோருக்கும் லட்சுமி நாராயணன் நோட்டீஸ் அனுப்பியுள்ளார். இவ்விவகாரத்தால் புதுச்சேரி மாநில அரசியலில் பெரும் பரபரப்பு ஏற்பட்டுள்ளது.
இதையும் படிங்க: 'நீட் தேர்வால் ஏற்படும் பாதிப்புக்கு மத்திய அரசு பொறுப்பேற்க வேண்டும்' - நாராயணசாமி
