பாரதப் பிரதமராக 2014இல் இருந்து பொறுப்பு வகித்துவரும் நரேந்திர மோடி உலகின் பல்வேறு நாடுகளுக்குச் சென்று பல்வேறு ஒப்பந்தம் மேற்கொண்டுவருகிறார். மேலும், தன்னை சர்வதேச முக்கியத் தலைவர்களின் ஒருவராக வளர்த்துக் கொண்டார்.
அவர் வெளிநாடுகளுக்குச் சென்று அந்நாட்டுத் தலைவர்களுடன் நட்புறவை ஏற்படுத்தியதோடு இந்தியாவுக்கு வரும் அயல்நாட்டுத் தலைவர்களுடனும் தோழமையை ஏற்படுத்திக் கொண்டார்.
அந்தவகையில், இந்தியாவுக்கு வந்த பல்வேறு நாடுகளைச் சேர்ந்த தலைவர்களை தலைநகர் டெல்லியை தவிர்த்து மற்ற இடங்களில் பிரதமர் நரேந்திர மோடி எப்போது, எங்கெங்கு, எந்நாட்டுத் தலைவர்களை சந்தித்தார் என்பதை கீழே பட்டியலிட்டுள்ளோம்.
| ஆண்டு | இடங்கள் | நாடுகள் | தலைவர்கள் |
| 2014 | ஆமதாபாத் | சீனா | ஜி ஜின்பிங் |
| 2015 | பெங்களூரு | ஜெர்மனி | ஏஞ்சலா மோர்கல் |
| 2015 | வாரணாசி | ஜப்பான் | ஷின்சோ அபே |
| 2016 | சண்டிகர் | ஃபிரான்ஸ் | ஃபிரான்கோயிஸ் ஹாலண்டே |
| 2017 | ஆமதாபாத் | ஜப்பான் | ஷின்சோ அபே |
| 2018 | ஆமதாபாத் | இஸ்ரேல் | பெஞ்சமின் நெதன்யாகு |
| 2018 | வாரணாசி | ஃபிரான்ஸ் | இம்மானுவேல் மேக்ரான் |
| 2019 | மாமல்லபுரம் | சீனா | ஜி ஜின்பிங் |
2014ஆம் ஆண்டு பிரதமராக பொறுப்பேற்றுக் கொண்ட நரேந்திர மோடி முதல் முறையாக சீன அதிபர் ஜி ஜின்பிங்கை டெல்லிக்கு வெளியே 2014ஆம் ஆண்டு குஜராத் தலைநகர் ஆமதாபாத்தில் சந்தித்தார். இருவரும் காந்திஜியின் ஆசிரமத்தில் சிறிது நேரம் உரையாடினார்கள். தொடர்ந்து சர்தார் சரோவர் அணையை சுற்றிப் பார்த்தனர்.
அதன் பின்னர் 2015ஆம் ஆண்டு ஜெர்மனி அதிபர் ஏஞ்சலா மோர்கலை பெங்களூருவிலும் அதே ஆண்டு வாரணாசியில் ஜப்பானிய பிரதமர் ஷின்சோ அபேயையும் சந்தித்தார்.
இவ்வாறு 2016ஆம் ஆண்டு ஃபிரான்ஸ் அதிபர் ஃபிரான்கோயிஸ் ஹாலண்டேவை சண்டிகரிலும் 2017ஆம் ஆண்டு ஜப்பானிய பிரதமர் ஷின்சோ அபேயை ஆமதாபாத்திலும் சந்தித்துப் பேசினார்.
இதேபோல், 2018ஆம் ஆண்டு இஸ்ரேலிய பிரதமர் பெஞ்சமின் நெதன்யாகுவை ஆமதாபாத்திலும் அதே ஆண்டு ஃபிரான்ஸ் அதிபர் இம்மானுவேல் மேக்ரானையும் வாரணாசியில் சந்தித்துக் கொண்டார்.
தற்போது சீன அதிபர் ஜி ஜின்பிங்கை தமிழ்நாட்டின் கடற்கரை சுற்றுலாத் தலமான மாமல்லபுரத்தில் பிரதமர் நரேந்திர மோடி சந்தித்துள்ளார். அந்த வகையில் தென் இந்தியாவில் பிரதமர் நரேந்திர மோடி வெளிநாட்டுத் தலைவர் ஒருவரை இரண்டாவது முறையாக சந்தித்துள்ளார் என்பது கவனிக்கத்தக்கது.
