இந்திய அரசு ஆண்டுதோறும் குடியரசு தினத்தன்று பத்ம விருதுகளை அறிவிக்கும். பல்வேறு துறைகளில் சிறந்து விளங்கும் ஆளுமைகளுக்கு இந்த விருதுகள் அளிக்கப்படுகின்றன. அதாவது, சமூக சேவை, பொது விவகாரங்கள், அறிவியல், பொறியியல், வர்த்தகம், தொழில், மருத்துவம், இலக்கியம், கல்வி, விளையாட்டு, குடிமைப்பணி போன்ற துறைகளில் சிறப்பாகப் பணியாற்றுவோர் இதற்குத் தேர்வுசெய்யப்படுவார்கள்.
கர்நாடக மாநிலத்தைச் சேர்ந்த துளசி கௌடா, நாட்டுப்புறச் சுற்றுச்சூழல் செயற்பாட்டாளர் ஆவார். அவர் தன்னுடைய ஊரைச் சுற்றிலும் உள்ள பகுதிகளில் காடு வளர்ப்பில் மிகவும் தீவிரமாக ஈடுபட்டுவருபவர்.
கடலோரக் கர்நாடகத்தின் அங்கோலா வட்டத்தில் அவர் ஒருவராகவே ஒரு லட்சத்துக்கும் மேற்பட்ட மரங்களை வளர்த்துள்ளார். பள்ளிக் கல்வி பயிலாதவராக இருந்தாலும் தாவரங்களைப் பற்றிய அவரது அறிவு ஒப்பிட முடியாதது. வனத் துறையில் அவர் பணியாற்றியபோதே அவர் மரங்களைப் பற்றி அவ்வளவையும் அறிந்துவைத்திருக்கிறார்.
ஹொனல்லி கிராமத்தில் ஒரு சிறிய குடிசையில் வசித்துவரும் அவர், மிகவும் எளிமையானவர். மரங்கள் மீதான அவரது காதலுக்காகவும் சுற்றுச்சூழல் மீதான அக்கறைக்காகவும் நன்கு அறியப்பட்டவர்.
தற்போது 74 வயதைத் தொடவிருக்கும் துளசி, அரசுப் பணியிலிருந்து ஓய்வுபெற்றுவிட்டார். ஆனாலும் அவர் தன்னுடைய முயற்சிகளைத் தொடர்ந்துகொண்டு இருக்கிறார்.
மரக்கன்றுகளை நடுவதிலும் அவை தாமாக ஊன்றி நிற்கும்வரை அவற்றை கவனித்து பராமரிப்பதிலும் துளசி அக்கறையோடு இருக்கிறார். அவர், ஹலக்கி என்னும் பழங்குடியினத்தைச் சேர்ந்தவர் ஆவார்.
அவருடைய கிராமத்தில் விரும்பத்தகாத வளர்ச்சிக்காகக் காடுகள் அழிக்கப்பட்டபோது அவர் ஆவேசமடைந்து கொந்தளித்துவிட்டார். முன்னதாக, கர்நாடக மாநில அரசாலும் மற்ற பல தரப்பினராலும் துளசியின் சொந்த மாவட்டத்தில் அவரின் சுற்றுச்சூழல் பாதுகாப்புக்கான பங்களிப்புக்காகப் பட்டமளித்து பாராட்டப்பட்டுள்ளார். மாநில அரசின் சார்பில் அவருக்கு ராஜ்யோத்சவா விருதும் வழங்கப்பட்டது.
இதையும் படிங்க: இந்திய குத்துச்சண்டை வீராங்கனை மேரி கோமின் வாழ்க்கைப் பயணம்!
