லடாக்கில் 'லைன் ஆஃப் ஆக்சுவல் கன்ட்ரோல்' எனப்படும் இந்திய-சீன எல்லைக் கட்டுப்பாட்டுப் பகுதியில் இருநாட்டுப் படைகளுக்கும் இடையே ஒரு மாதத்துக்கும் மேலாக மோதல் நிலவிவருகிறது.
இந்நிலையில், இந்த மோதல் வன்முறையாக வெடித்ததில் 20 இந்திய வீரர்கள் வீரமரணமடைந்தனர். இதைத் தொடர்ந்து லடாக் எல்லையில் போர் மேகம் சூழ்ந்துள்ளது.
இதற்கிடையே, திபெத்தை (சீனப் பகுதி) ஒட்டியுள்ள இமாச்சலப் பிரதேசத்தின் கின்நௌர், லாஹுல்-ஸ்மித் ஆகிய எல்லை மாவட்டங்கள் உஷார் நிலையில் வைக்கப்பட்டுள்ளன.
இது குறித்து காவல் கண்காணிப்பாளர் குஷால் ஷர்மாவிடம் கேட்டபோது, "லடாக் எல்லையில் இந்தியா-சீனா இடையே பயங்கர மோதல் நிலவிவருவதைக் கருத்தில்கொண்டு, கின்நௌர், லாஹுல்-ஸ்மித் மாவட்ட அலுவலர்கள் உஷார் நிலையில் இருக்குமாறும், உள்ளூர் மக்களின் பாதுகாப்பை உறுதிசெய்ய உரிய முன்னெச்சரிக்கை நடவடிக்கைகளை எடுக்குமாறும் அறிவுறுத்தப்பட்டுள்ளனர்" என்றார்.
கின்நௌர் மாவட்டத்தில் சீன எல்லையையொட்டி சுமார் 14 கிராமங்கள் உள்ளன. இந்தக் கிராம மக்கள் எல்லைப் பகுதிக்குள் பிரவேசிக்க வேண்டாம் என அறிவுறுத்தப்பட்டுள்ளதாகத் தகவல்கள் தெரிவித்தன.
இந்தக் கிராமங்களில் ராணுவ வாகனங்களின் நகர்வு, ராணுவ அலுவலர்களின் நடவடிக்கைகள் கண்காணிக்கப்பட்டுவருவதாக அரசு வட்டாரங்கள் தெரிவித்தன.
முன்னதாக, நேற்று இரவு இந்திய ராணுவம் வெளியிட்டிருந்த அறிக்கையில், இதுவரை 20 ராணுவத்தினர் உயிரிழந்துள்ளதாகவும், மோதல் ஏற்பட்ட கல்வான் பள்ளத்தாக்கில் இருதரப்பு ராணுவமும் பின்வாங்கியுள்ளதாகவும் தெரிவிக்கப்பட்டுள்ளது.
இதையும் படிங்க : 'வேதனையாக இருந்தாலும் அவனை எண்ணி பெருமை கொள்கிறோம்' - இன்னுயிர் ஈந்த சந்தோஷ் பாபுவின் பெற்றோர்!
