குடியுரிமை திருத்தச் சட்டத்திற்கு எதிராக நாடு முழுவதும் போராட்டங்கள் நடைபெற்றுவந்தன. கடந்த ஆண்டு, டிசம்பர் 15ஆம் தேதி டெல்லியின் பல பகுதிகளில் வன்முறைகள் வெடித்தன. இதற்கு காரணமாக பல பேர் கைது செய்யப்பட்டனர். இதனிடையே, மே 17ஆம் தேதி வன்முறையை காரணம் காட்டி, ஜாமியா பல்கலைக்கழக மாணவர் அமைப்பின் தலைவரான தன்ஹா கைது செய்யப்பட்டார்.
இதற்கு முன்னதாக, காவல் துறையினர் மீரான் ஹைதர், சபூரா சர்கர் ஆகியோரை உபா சட்டத்தின் கீழ் கைது செய்தனர். இந்த கைது நடவடிக்கையை ஜனநாயக விரோத செயல் என காங்கிரஸ் மூத்தத் தலைவர் சிதம்பரம் விமர்சித்துள்ளார். டெல்லியில் நடைபெற்ற செய்தியாளர் சந்திப்பில் இதுகுறித்து அவர் கூறுகையில், "இது கண்டனத்துக்குரியது. வழக்கு பொய்யாக கட்டமைக்கப்பட்டுள்ளது.
விசாரணைக்காக அழைத்தால் கைது செய்து விடுவார்களோ என்ற அச்ச உணர்வை மாணவர்கள் மத்தியில் விதைக்க முயற்சி மேற்கொள்ளப்பட்டுள்ளது. இது அவர்களின் எண்ணமாக இருந்தால், அது ஜனநாயக விரோத செயலாகும்" என்றார்.
இதுகுறித்து மாணவர் ஒருங்கிணைப்பு குழு வெளியிட்ட அறிக்கையில், "மாணவர் தன்ஹா கைது செய்யப்பட்ட சம்பவம் அதிர்ச்சி அளிக்கிறது. ஜாமியா ஒருங்கிணைப்பு குழுவின் முக்கிய தலைவர்களில் அவரும் ஒருவர். இந்தியா முழுவதும் நடைபெற்ற குடியுரிமை திருத்தச் சட்டத்திற்கு எதிரான போராட்டத்தின் முகமாக இருந்தவர். விசாரணைக்காக முதலில் அழைக்கப்பட்டு பின்னர் மாஜிஸ்திரேட் முன்பு ஆஜர்படுத்தப்பட்டு கைது செய்யப்பட்டுள்ளார்" என்றார்.
இதையும் படிங்க: மோடியின் கனவுத் திட்டத்தின் 29 ஊழியர்கள் பணிநீக்கம்!
