பிரதமர் நரேந்திர மோடி அரசின் வெளியுறவுத் துறை அமைச்சராக இருப்பவர் ஜெய்சங்கர். இவர் குஜராத் மாநிலத்திலிருந்து மாநிலங்களவைக்கு தேர்வானவர். இவரின் நியமனத்தை ரத்துசெய்ய வேண்டும் எனக் கூறி காங்கிரஸ் மாநில தலைவர்கள் கௌரவ் பாண்ட்யா, சந்திரிகா சூடாசாமா, பரேஷ் தனனி ஆகியோர் குஜராத் மாநில உயர் நீதிமன்றத்தில் வழக்கு தொடர்ந்தனர்.
இந்த வழக்கு கடந்த நான்காம் தேதியன்று தள்ளுபடியானது. இதனால் ஜெய்சங்கருக்கு எதிராக அவர்கள் உச்ச நீதிமன்றத்தில் மேல்முறையீடு செய்யலாம் என தகவல்கள் வெளியான வண்ணம் உள்ளன. இந்நிலையில் ஜெய்சங்கர் தனது வழக்கறிஞர் ஸ்வரூபமா சதுர்வேதி மூலமாக உச்ச நீதிமன்றத்தில் கேவியட் மனு தாக்கல் செய்துள்ளார்.
ஜெய்சங்கர் கடந்தாண்டு ஜூலை மாதம் குஜராத்திலிருந்து மாநிலங்களவைக்குத் தேர்வானார். கேவியட் மனு, முன்னெச்சரிக்கை மனுவாகப் பார்க்கப்படுகிறது. இது எதிர் தரப்பினருக்குச் சாதகமாக நீதிமன்றம் தீர்ப்பு வழங்காமல் தடுக்க, வாதி சார்பில் தாக்கல் செய்யப்படும் மனுவாகும்.
இந்த மனுவின் நோக்கம் நீதிமன்றம் வழக்கு தொடர்பாக எதுவும் முடிவெடுக்கும் முன்னர், வாதியின் (மனு தாக்கல் செய்தவர்) கருத்தையும் கேட்டு அறிந்துகொள்ள வேண்டும் என்பதே.
இதையும் படிங்க: 10,11,12 ம் வகுப்பு பொதுத்தேர்வு: ஆசிரியர்களுக்கான வழிகாட்டல் என்னென்ன? முழு விவரம்
