’கொரோனா பாதிப்பு இல்லை’- சான்று இல்லாமல் இத்தாலியில் தவிக்கும் இந்திய மாணவர்கள்!

ரோம்: கொரோனா பாதிப்பு இல்லையென்ற மருத்துவ சான்றிதழ்கள் இல்லாமல், இந்தியா திரும்ப முடியாமல் இத்தாலி விமான நிலையத்தில் இந்திய மாணவர்கள் தவிக்கின்றனர்.

கொரோனா நோய்தொற்று தீவிரமாக பரவிவரும் நிலையில், இத்தாலி தலைநகர் ரோம், மிலனுக்கு சில நிறுவனங்கள் விமான சேவையை ரத்து செய்துள்ளது. ஒரு சில விமானங்கள் இயங்கி வருவதாகத் தெரிகிறது. இதையடுத்து, இத்தாலியில் இருக்கும் இந்திய மாணவர்கள் 65 க்கும் மேற்பட்டோர், இந்தியா திரும்புவதற்காக நேற்றிரவு 11.30 மணிக்கு ரோம் விமான நிலையத்திற்கு வந்தனர்.

அப்போது, மாணவர்களிடம் கொரோனா வைரஸ் பாதிப்பு இல்லை என்ற மருத்துவச் சான்று கேட்கப்பட்டுள்ளது. அந்த மருத்துவச் சான்று, மாணவர்களிடம் இல்லாததால் அவர்கள் அனைவருக்கும் போர்டி​ங் பாஸ் வழங்கப்படவில்லை. இதனால், இந்தியா திரும்புவதில் சிக்கல் ஏற்பட்டுள்ளது.

இதுகுறித்து, மாணவர் ஒருவர் தெரிவிக்கையில், "இங்கு கொரோனா தொற்று அதிகளவில் பரவி வருவதால் நிறைய விதிமுறைகள் அமலில் உள்ளன. அதில், முக்கியமானது மருத்துவச் சான்று. இந்த சான்றினை பெறுவதற்காக மருத்துவமனை சென்றோம்.

ஆனால், காய்ச்சல், இருமல் உள்ளிட்ட அறிகுறிகள் இருந்தால் மட்டுமே பரிசோதனை செய்யப்பட்டு, சான்று கொடுக்க முடியும். இல்லாதபட்சத்தில் அதற்கு வாய்ப்பில்லை" என கூறிவிட்டனர்.

ஆனால், கொரோனா பாதிப்பு இல்லை என்ற சான்றை, இந்திய அரசாங்கம் கட்டாயமாகக் கேட்கிறது. எனவே, விமான நிலையத்தில் அதனை சமர்பிக்க வேண்டியச் சூழலுக்கு நாங்கள் தள்ளப்பட்டிருக்கிறோம். பல மணி நேரமாக இங்கு காத்துக் கொண்டிருப்பதால், மருத்துவச் சான்று இல்லாமல் மத்திய அரசு எங்களை இந்தியாவிற்கு அனுமதிக்க வேண்டுமென கோரிக்கை விடுத்தனர்.

குறிப்பாக, இந்திய மாணவர்கள் உணவு, உடை, பாதுகாப்பான இடம் உள்ளிட்ட அடிப்படை தேவைக்கு கூட மிகவும் சிரமப்படுவதாகவும் தெரிவிக்கின்றனர்.

இதையும் படிங்க: 'மன அழுத்தத்தைக் குறைக்கும் பொம்மலாட்டம்'