உத்தரப் பிரதேச மாநிலம், கான்பூரின் உள்ளூர் ரவுடியான விகாஸ் துபே என்பவரை காவல் துறையினர் கைது செய்ய சென்றனர். அப்போது, துபேவின் ஆட்கள் காவல் துறையினர் மீது நடத்திய தாக்குதலில் காவல் துறை துணை கண்காணிப்பாளர் உள்பட எட்டு காவலர்கள் படுகொலை செய்யப்பட்டனர். காவல் துறையினர் மீது நடத்தப்பட்ட இந்த கொலைவெறித் தாக்குதல் நாடு முழுவதும் பெரும் அதிர்வலைகளை ஏற்படுத்தியுள்ளது.
இந்நிலையில், இவ்வழக்கை விசாரித்துவரும் சிறப்பு காவல் படைக்கு ஒரு வீடியோ பதிவு கிடைத்துள்ளது. அதில், பாஜகவின் இரண்டு சட்டப்பேரவை உறுப்பினர்களுடன் தான் தொடர்பில் இருந்ததாக துபே தெரிவித்துள்ளார். 2017ஆம் ஆண்டு, காவல் துறையினர் நடவடிக்கை எடுத்தபோது, அபிஜித் சங்கா, பகவதி சாகர் ஆகிய பாஜக சட்டப்பேரவை உறுப்பினர்கள் தன்னை அதிலிருந்து காப்பாற்றியதாக துபே தெரிவித்துள்ளார்.
இதனை மறுத்துள்ள சங்கா, "எனது பித்தூர் தொகுதி மற்றும் அண்டை கிராம மக்கள் என்னிடம் உதவி கேட்டுவருவார்கள். பல வழக்குகளில் எதிர்தரப்புக்கு துபே ஆதரவு தெரிவிக்கும்போது, அவர்கள் மீது நடவடிக்கை எடுக்க காவல் துறையை நான் கேட்டுக் கொண்டுள்ளேன்" என்றார். தனது செல்வாக்கை கெடுக்கும் விதமாக தன் மீது அவதூறு பரப்பப்படுவதாக பகவதி குற்றஞ்சாட்டியுள்ளார். இந்த வீடியோ பதிவை சோதனைக்கு உட்படுத்த வேண்டும் என சங்கா, பகவதி ஆகியோர் கேட்டுக்கொண்டனர்.
இதையும் படிங்க: உத்தரப் பிரதேத்திற்கு சொந்தமான பகுதியில் சாலை அமைக்கும் நேபாளம்!
