குடியுரிமை திருத்தச் சட்டத்தை (சி.ஏ.ஏ.) எதிர்த்து பல்வேறு அரசியல் கட்சித் தலைவர்களும் கருத்து தெரிவித்துவருகின்றனர். குறிப்பாக, காங்கிரஸ் கட்சியின் மூத்தத் தலைவர்கள் முழுமூச்சாக குடியுரிமை திருத்தச் சட்டத்தை எதிர்க்கின்றனர். சமீபத்தில், அச்சட்டத்திற்கு எதிராகத் தொடரப்பட்ட வழக்குகளை விசாரித்த உச்ச நீதிமன்றம், அதற்கு இடைக்காலத் தடைவிதிக்க முடியாது எனத் திட்டவட்டமாகத் தெரிவித்தது.
தங்களின் கடைசி நம்பிக்கையான உச்ச நீதிமன்றமே இவ்வாறு தெரிவித்தது சி.ஏ.ஏ.வை எதிர்ப்பவர்களைக் கலக்கமடையச் செய்துள்ளது. அதன் வெளிப்பாடாக காங்கிரஸ் தலைவரும் மாநிலங்களை உறுப்பினருமான திக்விஜய சிங்கின் கருத்தும் அமைந்துள்ளது.
சி.ஏ.ஏ.வை அரசியலமைப்புக்கு எதிரானதாக உச்ச நீதிமன்றம் பார்க்காமல் அதனை ஆதரித்தால், மதச்சார்பின்மைக்கு அடிக்கப்பட்ட கடைசி ஆணி அதுவாக தான் இருக்கும் என்று கூறியுள்ளார். தொடர்ந்து பேசிய அவர், “வேற்றுமையில் ஒற்றுமை காண்பதே இந்தியாவின் மிகப்பெரிய பலம். அதனை மோடியும் அமித் ஷாவும் அழிக்க நினைக்கின்றனர்.
என்னை இஸ்லாமிய சார்பாளன் என்று கூறுகின்றனர். நான் இந்து சார்பாளனோ அல்லது இஸ்லாமிய சார்பாளனோ அல்ல. நான் இந்திய சார்பாளன். மோடி அரசின் கண்களுக்கு காவல் துணை கண்காணிப்பாளர் தவீந்தர் சிங் போன்றவர்கள் தேச விரோதிகளாகத் தெரியாமல், திக்விஜய சிங்தான் தேச விரோதியாகத் தெரிவார்.
இஸ்லாமியர்கள் இந்தியாவில் வாழ மிகவும் அச்சமடைந்துள்ளனர். அவர்களுக்கு இந்த அரசின் மீது ஏமாற்றம் ஏற்பட்டுள்ளது. அவர்களின் கடைசி நம்பிக்கை உச்ச நீதிமன்றம் மட்டுமே” என்று கூறியுள்ளார்.
இதையும் படிங்க: ‘அதிகாரத்தில் இருப்பவர்கள் ஜனநாயகத்தைத் துண்டாடுகிறார்கள்’ - சிதம்பரம்
