கரோனா பரவலைத் தடுக்க பொது முடக்கம் அறிவிக்கப்பட்டதைத் தொடர்ந்து, நாட்டிலுள்ள ஏழை, எளிய மக்களையும், பொது முடக்கத்தால் பெருமளவு பாதிக்கப்பட்டுள்ள மக்களை பாதுகாக்கும் வகையில் 1.7 லட்சம் கோடி ரூபாய் மதிப்பிலான பிரதம மந்திரி கரீப் கல்யாண் தொகுப்பை, கடந்த மார்ச் 26ஆம் தேதி நிதியமைச்சர் நிர்மலா சீதாராமன் அறிவித்தார்.
இந்தத் தொகுப்பின் கீழ், பெண்கள், ஏழைகள், மூத்த குடிமக்கள், விவசாயிகள் ஆகியோருக்கு இலவச உணவு தானியங்கள், நிதி உதவிகளை அளிக்கவிருப்பதாக அரசு அறிவித்தது.
இந்த அறிவிப்புகள் மக்களை உரிய முறையில் சென்று அடைகிறதா எனத் தொடர்ந்து கண்காணிக்கப்பட்டு வந்த நிலையில், இதுவரை இத்திட்டத்தின் கீழ் பிரதமர் உஜ்வாலா யோஜனா பயனாளிகளின் வங்கிக் கணக்குகளுக்கு 8,488 கோடி மாற்றப்பட்டுள்ளதாக அரசு அறிவித்துள்ளது.
இத்தொகுப்பின் கீழ் 8.58 கோடி இலவச உஜ்வாலா சிலிண்டர்கள் வழங்கப்பட்டும், 9.25 கோடி சிலிண்டர்கள் முன்பதிவு செய்யப்பட்டும் உள்ளன. மேலும், முன்னர் முடிவு செய்தபடி, உஜ்வாலா பயனாளிகளுக்கு ஜூன் 30ஆம் தேதி வரை உள்ளடங்கிய மூன்று மாதங்களுக்கு இலவச சமையல் எரிவாயு சிலிண்டர்களை விநியோகிக்கப்படும் என்றும் தெரிவிக்கப்பட்டுள்ளது.
ஊழியர் வருங்கால வைப்பு நிதிக் கணக்கு வைத்திருக்கும் ஊழியர்களின் நலனுக்காக ஜூன் இரண்டாம் தேதி வரை 895 கோடி ரூபாய் அளிக்கப்பட்டுள்ளதாகவும் நிதி அமைச்சகத்தின் அறிக்கையில் குறிப்பிடப்பட்டுள்ளது. மேலும், முதலாளிகள், பணியாளர்கள் இருவரின் 24 சதவிகித பிஎஃப் பங்களிப்பை மேலும் மூன்று மாதங்களுக்கு வழங்கவும் அரசு முடிவு செய்திருப்பதாகத் தெரிவிக்கப்பட்டுள்ளது.
பி எம் கிசான் யோஜனாவின் முதல் தவணை நிதியான 16,394 கோடி ரூபாயை வெளியிடப்பட்டுள்ளதுடன், 8.19 கோடி விவசாயிகளின் கணக்குகளுக்கு, 2,000 ரூபாய் நேரடி பணப்பரிமாற்றமும் செய்யப்பட்டுள்ளது.
மேலும், நேற்று வரை ஜன் தன் கணக்கு வைத்திருக்கும் பெண்களுக்கு 20,344 கோடி ரூபாயும், முதியவர்கள், கணவரை இழந்த பெண்கள், மாற்றுத் திறனாளிகளுக்கு 2,814 கோடி ரூபாயும் அரசு சார்பில் வழங்கப்பட்டுள்ளது.
இவை தவிர, 2.3 கோடி கட்டுமானத் தொழிலாளர்கள், இதுவரை 4,313 கோடி ரூபாய் நிதி உதவியைப் பெற்றுள்ளனர்.
இதையும் படிங்க : மத்திய அரசின் அறிவிப்புகள் சிறு, குறு தொழில் மீட்புக்கு உதவுமா?
