ஹரியானா மாநிலம் சிர்சா நகரில் பாஜக சார்பில் நேற்று மிகப்பெரிய பேரணி நடத்தப்பட்டது. அதில் அக்கட்சியின் தலைவர் ஜே.பி. நாட்டா கலந்துகொண்டார். பேரணியில் பேசிய அவர், "விவசாயிகள், ஏழைகள், சமூகத்தில் சுரண்டப்படுபவர்கள் என்று ஒரு காலத்தில் புறக்கணிக்கப்பட்ட அனைவரும், தற்போது மைய நீரோட்டத்திற்கு அழைத்து வரப்பட்டுள்ளனர். மத்தியிலுள்ள நரேந்திர மோடியின் அரசும், மாநிலத்திலுள்ள மனோகர் லால் அரசும்தான் இதற்குக் காரணம்.
பல்வேறு பேரணிகள் மூலம் அரசின் திட்டங்கள் குறித்து மக்களுக்குத் தெரியப்படுத்தப்படுகின்றன. அனைவரது நலனுக்காகவும் அரசு செயல்படுகிறது என்பதைக் காட்டும்விதமாகவே இது உள்ளது. பயிர்களின் உற்பத்தியை அதிகரிக்கவும், விளைபொருள்களுக்கு உரிய விலை கிடைக்கவும் பல திட்டங்கள் முன்னெடுக்கப்பட்டுள்ளன" என்றார்.
மேலும் ஹரியானா அரசு 'பேட்டி பச்சாவ் பேட்டி படாவ்' திட்டத்தைச் சிறப்பாகச் செயல்படுத்துவதாகப் பாராட்டிப் பேசிய நட்டா, "ஆண் - பெண் விகிதம் ஆயிரத்திற்கு 830 என்பதிலிருந்து தற்போது 923ஆக அதிகரித்துள்ளது. இதற்கு மாநில அரசின் விழிப்புணர்வு திட்டங்களே காரணம்" என்று புகழ்ந்து பேசினார்.
இந்நிகழ்ச்சியில் ஹரியானா முதலமைச்சர் மனோகர் லால் கட்டாரும் கலந்துகொண்டார். இந்நிகழ்ச்சியில், ரூ.50 கோடி மதிப்பிலான பல்வேறு மேம்பாட்டுத் திட்டங்களுக்கு மனோகர் லால் அடிக்கல் நாட்டினார்.
இதையும் படிங்க: 'விவசாயிகளின் பிரச்னைக்குச் செவி சாயுங்கள்'- பிரியங்கா வலியுறுத்தல்
