கோவிட்-19 வைரஸ் பெருந்தொற்று பரவுவதை தடுக்கும் விதத்தில் முழுஅடைப்பு அமலில் உள்ளபட்சத்தில், கர்ப்பிணி பெண்கள், டயாலிசிஸ் நோயாளிகள் உள்ளிட்டோரின் மருத்துவ தேவைகளை பூர்த்திசெய்வது குறித்து மாநிலங்கள் கவனத்தில்கொள்ள வேண்டும் என்று மத்திய சுகாதார அமைச்சர் ஹர்ஷவர்தன் தெரிவித்துள்ளார்.
கோவிட்-19 வைரஸ் தொற்றுநோய் தாக்காத வகையில் தற்காத்துக்கொள்ள தனிமைப்படுத்துதல் மற்றும் ஆயத்தப் பணிகள் மறுஆய்வு குறித்து மாநில மற்றும் யூனியன் பிரதேசங்களின் சுகாதார அமைச்சர்களுடன் காணொலி மூலமாக (வீடியோ கான்பிரன்சிங்) மத்திய சுகாதாரத்துறை அமைச்சர் ஹர்ஷவர்தன் ஆலோசனை நடத்தினார்.
அப்போது ஒவ்வொரு மாநிலத்திலும் தனிப்பட்ட பாதுகாப்பு உபகரணங்களான N-90 முகக் கவசங்கள், சோதனைக் கருவிகள், மருந்துகள் மற்றும் வென்டிலேட்டர்களின் இருப்பு தேவை குறித்து கேட்டறிந்தார்.
இதையடுத்து அவர் தெரிவிக்கையில், “இந்த முக்கியமான பொருள்களின் விநியோகத்தில் தட்டுப்பாடு இல்லை என்பதை உறுதிப்படுத்த அரசாங்கம் தன்னால் முடிந்தவரை முயற்சி செய்கிறது. பல்வேறு பொருட்களுக்கு ஏற்கனவே ஆர்டர்கள் கொடுக்கப்பட்டுள்ளது.
மறுபுறம் மாநிலங்கள் குறிப்பிட்டுள்ள பொருள்களின் தேவைக்கும் தீர்வு காணப்படுகிறது. நாட்டில் புதிய கரோனா வைரஸ் (கோவிட்-19) தொற்றுநோய் காரணமாக உயிரிழந்தோர் எண்ணிக்கை 242 ஆக உள்ளது.
இந்நேரத்தில் டயாலிசிஸ், தலசீமியா (இரத்த சிவப்பணுக்கள் குறைவு ) நோயாளிகள் மற்றும் கர்ப்பிணி பெண்கள் உள்ளிட்டோரின் மருத்துவ தேவைகளை பூர்த்திசெய்வது குறித்து ஒவ்வொரு மாநிலங்களும் கவனத்தில் கொள்ள வேண்டும்.
மாநிலங்கள் தன்னார்வ ரத்த தானத்தை ஊக்குவிக்க வேண்டும். மேலும், எந்த நேரத்திலும் போதுமான அளவு ரத்தத்தை வழங்குவதற்காக பாதுகாப்பான ரத்த தானத்திற்கு மொபைல் சேவைகளை ஏற்பாடு செய்ய வேண்டும்.
புதிய கரோனா தொற்றுக்கு எதிரான போராட்டம் தொடங்கி மூன்று மாதத்திற்கும் மேலாகிவிட்டது. பாதுகாப்பு, கட்டுப்பாடு நடிவடிக்கைளை அனைத்து மாநிலங்களும் இணைந்து மிகச் சிறந்த முறையில் செயல்படுத்தி வருகின்றன.
அரசாங்கம் முன்கூட்டிய பல முக்கியமான நடிவடிக்கைகளை மேற்கொண்டுள்ளது. அது இந்தச் சூழ்நிலையை கடந்து செல்ல உதவுகிறது. மேலும், எந்தச் சூழ்நிலையையும் சமாளிக்க தயாராக இருக்க வேண்டும்.
அடுத்த சில வாரங்களுக்கு சமூக இடைவெளியை கடைப்பிடித்தல் மற்றும் தனிப்பட்ட சுகாதாரம் குறித்த விழிப்புணர்வை பரப்புதல் போன்றவற்றை உறுதிப்படுத்த வேண்டும்.
அது புதிய கரோனா பெருந்தொற்று பரவுவதை தடுத்து நிறுத்தி, அதற்கு எதிராக போராட உதவும். நாட்டின் ஒவ்வொரு மாவட்டத்திலும் பிரத்யேக கோவிட்-19 மருத்துவமனைகளை நிறுவி, அவற்றை விரைவில் மக்களுக்கு தெரியப்படுத்த வேண்டும். இதனால் மக்கள் கரோனா வைரஸ் பற்றிய தகவல்களை தெரிந்துகொள்ள முடியும்” என்றார்.
