நோயெதிர்ப்பு சக்தி கொட்டிக்கிடக்கும் பழங்களைத் தெரிந்து கொள்ளுங்கள்!

கரோனா காலத்தில் நோயெதிர்ப்பு சக்தியின் முக்கியத்துவத்தை மக்கள் அறிய வேண்டிய‌ கட்டாயத்தில் உள்ளனர். இது பல பழங்கள் மூலம் எளிதான வகையில் நமக்கு கிடைக்கும்.

கரோனா பரவல், நோயெதிர்ப்பு சக்தியின் முக்கியத்துவத்தை நமக்கு கற்றுத் தந்துள்ளது. குளிர்காலம் தற்போது தொடங்கியுள்ள நிலையில், நமது நோயெதிர்ப்பு சக்தி கொஞ்சம் பலவீனமடைந்தாலும் சளி, காய்ச்சல் போன்ற தொற்று நோய் பாதிப்புகள் எளிதாக ஏற்படும். எனவே, அவற்றை எதிர்கொள்ள உதவும் பருவகால பழங்கள் குறித்து இக்கட்டுரையில் காணலாம்.

ஆரஞ்சு

இந்த ருசியான குளிர்காலப் பழத்தில் வைட்டமின் ஏ, வைட்டமின் பி, வைட்டமின் சி, கால்சியம், மெக்னீசியம், பொட்டாசியம், பாஸ்பரஸ் போன்ற பிற ஊட்டச்சத்துக்களும் நிறைந்துள்ளன. ஆரஞ்சுப் பழம் ஆரோக்கியத்திற்கு மிகவும் நல்லது. கொழுப்பைக் குறைப்பதோடு, எடைக் குறைப்பதற்கும் இது உதவுகிறது. சிட்ரஸ் குடும்பத்தின் பழமாக இருப்பதால், இது நமது சருமத்திற்கும் கூந்தலுக்கும் மிகவும் நன்மை பயக்கும். வைட்டமின் சி தவிர ஆரஞ்சிலும் வைட்டமின் டி நிறைந்துள்ளது. இது ஒரு வலுவான நோயெதிர்ப்பு சக்தியை உருவாக்க உதவுகிறது. மேலும், பருவகால நோய்த்தொற்றுகளிலிருந்து நம்மைப் பாதுகாத்துக் கொள்ளவும் இப்பழம் உதவுகிறது.

கிவி

கிவி பழம் மிகவும் ஆரோக்கியமான பழமாகும். ஏனெனில் இதில் பொட்டாசியம், வைட்டமின் சி, வைட்டமின் ஈ, வைட்டமின் கே போன்ற பல ஊட்டச்சத்துக்கள் உள்ளன. கண்பார்வையை மேம்படுத்த இப்பழம் பலராலும் பரிந்துரைக்கப்படுகிறது. கிவியில் ஃபைபர், ஆக்ஸிஜனேற்றிகள், பொட்டாசியம் நிறைந்துள்ளது. இது ரத்த அழுத்தத்தைக் கட்டுப்படுத்துகிறது. நோய் எதிர்ப்பு சக்தியை அதிகரிப்பதோடு, செரிமான அமைப்பையும் ஆரோக்கியமாக வைத்திருக்கிறது.

மாதுளை

மாதுளையின் நன்மைகள் அனைவருக்கும் தெரியும். எவரேனும் நோய்வாய்ப்படும்போதெல்லாம் பொதுவாக டாக்டர்களால் பரிந்துரைக்கப்படும் ஒரே பழம் மாதுளை ஆகும். மாதுளை நார்ச்சத்து, வைட்டமின் கே, வைட்டமின் சி, வைட்டமின் பி, இரும்பு, பொட்டாசியம், துத்தநாகம், ஒமேகா-6 கொழுப்பு அமிலங்கள் போன்ற ஊட்டச்சத்துக்களைக் கொண்டுள்ளது. இதில் ஆன்டி ஆக்ஸிடன்ட்கள் அதிகம் உள்ளன. அதன் குணப்படுத்தும் பண்புகள் காரணமாக, இது பல நோய்களில் உடலை ஆரோக்கியமாக வைத்திருக்க உதவுகிறது. ரத்த அழுத்த நோயாளிகளுக்கும் இப்பழம் மிகவும் உதவியாக இருக்கும்.

மொசாம்பி

வைட்டமின் சி இப்பழத்தில் அதிக அளவில் உள்ளது. வைட்டமின் ஏ, வைட்டமின் பி காம்ப்ளக்ஸ், ஃபிளாவனாய்டு, அமினோ அமிலங்கள், கால்சியம், அயோடின், பாஸ்பரஸ், சோடியம் மற்றும் மாங்கனீசு போன்ற பிற ஊட்டச்சத்துக்களையும் கொண்டுள்ளது. உடலின் நோய் எதிர்ப்பு சக்தியை வலுப்படுத்த உதவுகிறது.

ஆப்பிள்

“ஒரு நாளைக்கு ஒரு ஆப்பிள், மருத்துவரை விலக்கி வைக்கிறது” என்ற பழமொழியை நீங்கள் அனைவரும் அறிந்திருக்க வேண்டும். ஆப்பிள்களில் காணப்படும் பாலிபினால்கள் மற்றும் ஃபிளாவனாய்டுகள் இதய ஆரோக்கியத்திற்கு மிகவும் பயனுள்ளதாக இருக்கும். கூடுதலாக, இது உங்கள் உடலுக்குத் தேவையான தாதுக்கள் மற்றும் பொட்டாசியத்தின் சிறந்த மூலமாகும். ஆப்பிள், ஃபைபர், வைட்டமின் பி, வைட்டமின் சி, வைட்டமின் கே மற்றும் ஆக்ஸிஜனேற்றப் பண்புகளால் நிறைந்துள்ளது. இது தோல் மற்றும் செரிமானத்தை மேம்படுத்துவதோடு மட்டுமல்லாமல், நம் உடலுக்கு அதிக அளவு நோய் எதிர்ப்பு சக்தியையும் வழங்குகிறது.

கொய்யா

கொய்யா நார்ச்சத்துக்களின் சிறந்த ஆதாரங்களில் ஒன்றாகும். இது செரிமான அமைப்புக்கு சிறந்ததாகக் கருதப்படுகிறது. கொய்யாவில் காணப்படும் வைட்டமின் ஏ, வைட்டமின் ஈ ஆகியவை கண்கள், முடி மற்றும் சருமத்தை ஆரோக்கியமாகப் பேண உதவுகிறது. இது உடலை தோல் நோய்களிலிருந்து பாதுகாக்கிறது. கொய்யாவும் நம் இதயத்திற்கு மிகவும் நல்லது என்றே கருதப்படுகிறது. அதே போல் நம் இரத்தத்தில் உள்ள சர்க்கரையின் அளவை சமப்படுத்தவும் கொய்யா உதவுகிறது.

நீங்கள் புதிய பழச்சாறுகளையும் உட்கொண்டிருக்கலாம், ஆனால் அதில் சர்க்கரை சேர்க்க வேண்டாம் என்பதை நிச்சயம் நினைவில் கொள்ளுங்கள். ஏனெனில் இது உங்கள் ஆரோக்கியத்தை எதிர்மறையான முறையில் பாதிக்கும்.