கரோனா வைரஸ் பாதிப்பால் பணக்கார முதலாளி முதல் கூலி வேலை செய்யும் தொழிலாளி வரை அனைவரும் பாதிக்கப்பட்டுள்ளார்கள் என்று தான் சொல்ல வேண்டும். நாளுக்கு நாள் வர்த்தக உலகம் கடுமையாகப் பாதிக்கத் தொடங்கியதால் வரலாறு காணாத அளவில், இந்திய நாட்டின் மொத்த உள்நாட்டு உற்பத்தி ஒரு விழுக்காட்டிற்கும் கீழ் குறைந்துள்ளது.
நிலைமையை சரிசெய்ய மத்திய அரசு பொருளாதாரத்தைத் தூண்டும் வகையில் 20 லட்சம் கோடி ரூபாய் மதிப்புள்ள 'ஆத்ம நிர்பார் பாரத் அபியான்' என்ற திட்டத்தை தொடங்கியது.
இந்தத் திட்டத்திற்காக மத்திய அரசு ஒதுக்கியுள்ள தொகை 2019-20 நிதி ஆண்டுக்கான மொத்த உள்நாட்டு உற்பத்தியில் 10 விழுக்காடாகும். 'என்னது இவ்வளவு பெரிய தொகையா' என உலக நாடுகள் திரும்பிப் பார்க்கும் வகையில், இந்த 'ஆத்ம நிர்பார் பாரத் அபியான்' திட்டத்தின் கீழ், பல அறிவிப்புகளை மத்திய நிதி அமைச்சர் நிர்மலா சீதாராமன் ஐந்து நாட்களாக வெளியிட்டார்.
மாபெரும் தொகையை உள்ளடக்கிய இந்தத் திட்டம் ஜப்பான், அமெரிக்கா, சுவீடன், ஆஸ்திரேலியா, ஜெர்மனி ஆகிய நாடுகள் ஒதுக்கியுள்ள நிதிக்கு சமமாக பார்க்கப்படுகிறது.
மேலும் மொத்த உள்நாட்டு உற்பத்தியை ஒப்பிட்டுப் பார்க்கையில் அமெரிக்கா ஒதுக்கியுள்ள தொகையை விட, இந்த 'ஆத்ம நிர்பார் பாரத் அபியான் திட்டம்' 1.8 விழுக்காடு பெரியதாகப் பார்க்கப்படுகிறது.
இந்தியாவின் நம்பர் 1 பணக்காரர் ஆன முகேஷ் அம்பானியின் சொத்து மதிப்பை விட ஐந்து மடங்கு பெரியது, இந்த 'ஆத்ம நிர்பார் பாரத் அபியான் திட்டத்தின் மதிப்பு’. கரோனா வைரஸ் நிவாரணத் திட்டத்திற்காக ஒவ்வொரு நாடும் தனது மொத்த உள்நாட்டு உற்பத்தியில் இருந்து, ஒரு குறிப்பிட்டத் தொகையை வழங்கியுள்ளது.
அதன்படி, அமெரிக்கா அந்நாட்டின் மொத்த உள்நாட்டு உற்பத்தியில் இருந்து 13 விழுக்காடும், ஜப்பான் 21 விழுக்காடும், பிரான்ஸ் 9.3 விழுக்காடும் ஒதுக்கியுள்ளது என்பது குறிப்பிடத்தக்கது.
இதையும் படிங்க: மேலும் 3 மாதங்களுக்கு EMI ஒத்திவைக்க வாய்ப்பு - ஆய்வில் தகவல்
