யாதகிரி: கர்நாடக மாநிலம் யாதகிரி மாவட்டத்தில் இளம்பெண் ஒருவர் ஆட்டோ டிரைவர் மற்றும் அவரது நண்பர்களால் ஏப்.26ஆம் தேதி கூட்டுப் பாலியல் வன்கொடுமை செய்யப்பட்டார். இது தொடர்பாக காவலர்கள் வழக்குப்பதிவு செய்து விசாரணை நடத்திவந்தனர்.
கூட்டுப் பாலியல் வன்புணர்வு: யாதகிரி நகரில் உள்ள நிறுவனத்தில் பணியை முடித்துக்கொண்டு ஏப்.26ஆம் தேதியன்று இளம்பெண் ஒருவர் ஆட்டோவில் வீடுதிரும்பினார். அப்போது அந்த ஆட்டோவில், வேறு ஒரு ஆணும் ஏறினார். இந்த நிலையில் ஆட்டோ ஆள் ஆரவாரமற்ற இடத்திற்கு சென்றது. அங்கு அந்தப் பெண்ணை ஆட்டோ டிரைவரும் அவரது நண்பரும் பாலியல் வன்கொடுமை செய்தனர்.
இதை வீடியோவாக பதிவும் செய்துகொண்டனர். மேலும் இதை வெளியில் கூறினால், வீடியோவை இணையத்தில் பதிவிட்டு, கொலை செய்துவிடுவதாக மிரட்டியுள்ளனர். இந்த நிலையில் பாதிக்கப்பட்ட பெண் காவல் நிலையத்தில் புகார் அளித்தார்.
இருவர் கைது-112 இலவச எண்: இந்தப் புகாரின் அடிப்படையில் காவலர்கள் ஆட்டோ டிரைவர் ஹனுமந்த் மற்றும் அவரது நண்பர் நரசப்பா ஆகியோரை கைது செய்தனர். மேலும் கடத்தலுக்கு பயன்பட்ட ஆட்டோவையும் பறிமுதல் செய்தனர். சம்பவத்தன்று இளம்பெண் இருவரின் காலில் விழுந்தும் கெஞ்சியுள்ளார்.
ஆனாலும் இரக்கமற்று அப்பெண்ணை பாலியல் வன்புணர்வு செய்ததுடன், அதை இருவரும் வீடியோவாகவும் பதிவு செய்துள்ளனர். இந்தச் சம்பவம் குறித்து பேசிய மாவட்ட காவல் கண்காணிப்பாளர் டாக்டர். வேத மூர்த்தி, “பெண்கள் தங்களின் பாதுகாப்பிற்கு பெப்பர் ஸ்பிரே வாங்கி வைத்துக் கொள்ளவும். ஏதேனும் நெருடலாக தெரிந்தால் காவல் இலவச உதவி எண்ணான 112க்கு அழைக்கவும்” எனத் தெரிவித்தார்.
இதையும் படிங்க : பாலியல் தொந்தரவு செய்து சிறுமியின் தலையை துண்டித்த கொடூரம்... இளைஞருக்கு தூக்கு...
