டெல்லி : உத்தரப்பிரதேச மாநிலம், காசிபூர் மக்களவைத் தொகுதி உறுப்பினர் அப்சல் அன்சாரியின் எம்.பி பதவியை பறித்து மக்களவைச் செயலகம் நடவடிக்கை மேற்கொண்டு உள்ளது. பகுஜன் சமாஜ் கட்சியின் மூத்த தலைவரும், காசிபூர் மக்களவைத் தொகுதியின் எம்.பி.யுமான அப்சல் அன்சாரிக்கு நான்கு ஆண்டுகள் சிறைத் தண்டனை விதிக்கப்பட்டதை அடுத்து, நடவடிக்கை மேற்கொள்ளப்பட்டு உள்ளதாகத் தெரிவிக்கப்பட்டுள்ளது.
கடந்த 2005ஆம் ஆண்டு நவம்பர் மாதம் 29ஆம் தேதி காசிபூர் தொகுதியின் முன்னாள் பாஜக எம்.எல்.ஏ கிருஷ்ணானந்த் ராய் கொலை செய்யப்பட்டார். இந்த வழக்கில் அப்சல் அன்சாரிக்கு தொடர்பு இருப்பதாகக் கூறி உத்தரப்பிரதேச மாநிலம், காசிபூரில் உள்ள எம்.பி.; எம்.எல்.ஏ.க்களுக்கு எதிரான வழக்குகளை விசாரிக்கும் கூடுதல் செசன்ஸ் நீதிமன்றத்தில் வழக்கு விசாரணை நடைபெற்று வந்தது.
இந்த வழக்கின் இறுதி கட்ட விசாரணை நிறைவுபெற்ற நிலையில் அப்சல் அன்சாரியை குற்றவாளி என நீதிமன்றம் அறிவித்தது. மேலும் இந்த வழக்கில் அப்சல் அன்சாரிக்கு சிறப்பு நீதிமன்றம் 4 ஆண்டுகள் சிறைத் தண்டனை விதித்தது. மேலும் கடந்த 1997ஆம் ஆண்டு வாரணாசியைச் சேர்ந்த தொழிலதிபர் நந்த் கிஷோர் ருங்தா என்பவர் கடத்தி கொலை செய்யப்பட்ட வழக்கும் இவர் மீது நிலுவையில் இருந்தது குறிப்பிடத்தக்கது.
இந்நிலையில், நீதிமன்றத்தின் 4 ஆண்டுகள் சிறைத் தண்டனையை அடுத்து அப்சல் அன்சாரியின் எம்.பி. பதவியை பறித்து மக்களவைச் செயலகம் நடவடிக்கை எடுத்து உள்ளது. இது தொடர்பாக மக்களவைச் செயலகம் வெளியிட்டுள்ள அறிக்கையில், "கொலை வழக்கில் உத்தரப்பிரதேச மாநிலம், காசிபூர் மக்களவைத் தொகுதி உறுப்பினர் அப்சல் அன்சாரிக்கு 4 ஆண்டுகள் சிறைத்தண்டனை அறிவிக்கப்பட்டதை அடுத்து, அவரது எம்.பி. பதவியில் இருந்து நீக்கம் செய்யப்பட்டார்.
மக்கள் பிரதிநிதித்துவச் சட்டம் 1951-ன் கீழ் இந்திய அரசியலமைப்புச் சட்டத்தின் விதிகளின்படி ஏப்ரல் 23ஆம் தேதி 2023அன்று முதல் அவர் மக்களவை உறுப்பினர் பதவியில் இருந்து நீக்கப்பட்டார்" எனத் தெரிவிக்கப்பட்டு உள்ளது. இதே வழக்கில் அப்சல் அன்சாரியின் சகோதரரும், பிரபல ரவுடி மற்றும் அரசியல்வாதியுமான முக்தார் அன்சாரியையும் நீதிமன்றம் குற்றவாளி என அறிவித்தது.
முக்தார் அன்சாரிக்கு 10 ஆண்டுகள் சிறைத் தண்டனை விதித்து சிறப்பு நீதிமன்றம் உத்தரவிட்டுள்ளது. கடந்த சில நாட்களுக்கு முன் கேரள வயநாடு மக்களவைத் தொகுதி உறுப்பினர் ராகுல் காந்தியின் எம்.பி. பதவியையும் பறித்து மக்களவைச் செயலகம் நடவடிக்கை எடுத்தது. கர்நாடகாவில் 2019ஆம் ஆண்டு நடந்த தேர்தல் பிரசாரத்தின் போது பிரதமர் மோடி குறித்து அவதூறு கருத்து வெளியிட்டதாக ராகுல் காந்தி மீது வழக்குப் பதிவு செய்யப்பட்டது.
இந்த வழக்கில் சூரத் நீதிமன்றம் ராகுல் காந்தியை குற்றவாளி என அறிவித்தது. மேலும் அவருக்கு இரண்டு ஆண்டுகள் சிறைத் தண்டனை விதித்தும் நீதிமன்றம் தீர்ப்பு வழங்கியது. இந்த தீர்ப்பை மேற்கொள்காட்டி மக்களவைச் செயலகம் ராகுல் காந்தியின் எம்.பி. பதவியை பறித்து நடவடிக்கை மேற்கொண்டது குறிப்பிடத்தக்கது.
இதையும் படிங்க : 14 செல்போன் செயலிகளுக்குத் தடை - உளவு பார்த்ததாக மத்திய அரசு நடவடிக்கை!
