பாட்னா: மத்தியில் ஆட்சியில் உள்ள பிரதமர் நரேந்திர மோடி தலைமையிலான தேசிய முற்போக்கு கூட்டணி அரசை, 2024ஆம் ஆண்டில் நடைபெற உள்ள பொதுத் தேர்தலில் தோற்கடிக்கும் பொருட்டு, காங்கிரஸ், திமுக, திரிணமூல் காங்கிரஸ், ஐக்கிய ஜனதா தளம், தேசியவாத காங்கிரஸ் கட்சி, ஆம் ஆத்மி, தேசிய மாநாட்டு கட்சி உள்ளிட்ட எதிர்கட்சிகள் ஒன்றிணைந்து, பிகார் தலைநகர் பாட்னாவில், ஐக்கிய ஜனதா தள கட்சியின் தலைவரும், பிகார் மாநில முதலமைச்சருமான நிதீஷ் குமார் தலைமையில் கூட்டத்தை நடத்தியது.
கர்நாடக மாநிலம் பெங்களூருவில் நடைபெற்ற எதிர்கட்சிகளின் இரண்டாவது கூட்டத்தில் 15க்கும் மேற்பட்ட கட்சிகள் பங்கேற்று இருந்தன. இந்த கூட்டத்திற்கு, காங்கிரஸ் கட்சியின் தலைவர் மல்லிகார்ஜூனா கார்கே தலைமையேற்றார். இந்த கூட்டத்தில் தான், எதிர்கட்சிகளின் கூட்டமைப்பிற்கு, இந்திய தேசிய வளர்ச்சிக்கான ஒருங்கிணைந்த கூட்டணி (INDIA) என்று பெயர் சூட்டப்பட்டது. இந்த கூட்டணியின் மூன்றாவது கூட்டம் மும்பையில் இம்மாத இறுதியில் நடைபெற உள்ளது.
இந்திய தேசிய வளர்ச்சிக்கான ஒருங்கிணைந்த கூட்டணியின் (INDIA) ஒருங்கிணைப்பாளர் பதவி விவகாரத்தில், கூட்டணி கட்சிகள் இடையே, எவ்வித மனஸ்தாபமும் ஏற்படவில்லை என்று ராஷ்டிரிய ஜனதா தள கட்சி தலைவரும், பிகார் முன்னாள் முதலமைச்சருமான லாலு பிரசாத் யாதவ் தெரிவித்து உள்ளார்.
பிகார் மாநிலம் கோபால்கஞ்ச் பகுதியில் பத்திரிகையாளர்களை சந்தித்த லாலு பிரசாத் யாதவ் கூறியதாவது, இந்திய தேசிய வளர்ச்சிக்கான ஒருங்கிணைந்த கூட்டணியின் (INDIA) ஒருங்கிணைப்பாளர் பதவி விவகாரத்தில், கூட்டணி கட்சிகள் இடையே, எவ்வித மனஸ்தாபமும் ஏற்படவில்லை மகாராஷ்டிரா மாநிலம் மும்பையில், ஆகஸ்ட் மாதம் 31ஆம் தேதி மற்றும் செப்டம்பர் மாதம் 1ஆம் தேதி நடைபெற உள்ள INDIA கூட்டணியின் மூன்றாவது கூட்டுக் கூட்டத்தில், கூட்டணியின் ஒருங்கிணைப்பாளர் இறுதி செய்யப்பட வாய்ப்பு உள்ளது.
INDIA கூட்டணியின் ஒருங்கிணைப்பாளர் பதவிக்கு, யார் வேண்டுமானாலும் வரலாம் என்று தெரிவித்து உள்ள் லாலு, ஒரு மாநிலத்திற்கு ஒரு ஒருங்கிணைப்பாளர் அல்லது மூன்று முதல் 4 மாநிலங்களுக்கு சேர்த்து ஒரு ஒருங்கிணைப்பாளர் என ஒன்றுக்கு மேற்பட்ட ஒருங்கிணைப்பாளர்கள் நியமிக்கப்பட வாய்ப்பு உள்ளது. கூட்டணிக்கு ஒருங்கிணைப்பாளர் அல்லது ஒருங்கிணைப்பாளர்கள் நியமிக்கப்படும் விவகாரம் குறித்து மும்பை கூட்டத்தில் இறுதி செய்யப்பட உள்ளதாக லாலு குறிப்பிட்டு உள்ளார்.
