இன்புளுயன்சா வைரசால் மேலும் ஒரு உயிரிழப்பு - பரவல் தீவிரம்?

எச்3 என்2 இன்புளுயன்சா வைரஸ் காய்ச்சலுக்கு குஜராத்தை சேர்ந்த 58 வயது மூதாட்டி உயிரிழந்ததாக தகவல் வெளியாகி உள்ளது.

குஜராத்: எச்3 என்2 எனப்படும் இன்புளுயன்சா காய்ச்சல் நாடு முழுவதும் பல்வேறு இடங்களில் பரவி வருகிறது. கரோனா போன்று இந்த வகை வைரஸ் காய்ச்சலுக்கும் சளி, தும்மல், இருமல், சுவாச பிரச்சினைகள் உள்ளிட்ட பாதிப்புகள் அறிகுறிகளாக காணப்படுகிறது. இந்த வைரஸ் தாக்குதல் காரணமாக பலர் மருத்துவமனைகளில் அனுமதிக்கப்பட்டு சிகிச்சை பெற்று வருகின்றனர்.

இந்நிலையில், குஜராத் மாநிலத்தில் இன்புளுயன்சா வைரஸ் தாக்குதலுக்கு உள்ளான பெண்மணி உயிரிழந்ததாக தகவல் வெளியாகி உள்ளது. வதோதரா பகுதியைச் சேர்ந்த அந்த 58 வயது பெண்மணி கடந்த இரண்டு நாட்களுக்கு முன் காய்ச்சல் உள்ளிட்ட உடல் நலக் கோளாறு காரணமாக மருத்துவமனையில் அனுமதிக்கப்பட்டதாக தெரிவிக்கப்பட்டுள்ளது.

கடந்த இரண்டு நாட்களாக சிகிச்சை பெற்று வந்த நிலையில், திடீரென உயிரிழந்ததாக மருத்துவர்கள் தெரிவித்து உள்ளனர். இருப்பினும் இது தொடர்பாக எந்தவித அதிகாரப்பூர்வ அறிவிப்பும் வெளியிடப்படவில்லை. அதேநேரம் அந்த முதிய பெண்மணி உயர் இரத்த அழுத்த பாதிப்பு இருந்ததாகவும், வெண்டிலேட்டர் மூலம் சிகிச்சை பெற்று வந்ததாகவும் மருத்துவர்கள் தெரிவித்து உள்ளனர்.

மூதாட்டியிடம் இருந்து பெறப்பட்ட மாதிரிகளை ஆய்வுக்கு உட்படுத்தியதில் எச்3 என்2 அறிகுறி இருப்பது கண்டறியப்பட்டு உள்ளதாக மருத்துவரகள் தெரிவித்து உள்ளனர். இதன்மூலம் வதேதரா மாநகராட்சியில் பதிவான முதல் எச்3என்2 வைரஸ் உயிரிழப்பு எனத் தெரிவிக்கப்பட்டு உள்ளது.

மூதாட்டி உயிரிழந்த அதே மருத்துவமனையில், காய்ச்சல் உள்ளிட்ட அறிகுறிகளுடன் அனுமதிக்கப்பட்ட 36 பேரிடம் மாதிரிகள் சேகரிக்கப்பட்டு ஆய்வுக்கு உட்படுத்தியதில் 2 பேருக்கு எச்3என்2 பாதிப்பு இருப்பது கண்டறியப்பட்டு உள்ளதாக மருத்துவர்கள் தெரிவித்து உள்ளனர். மேலும் நோய் தடுப்பு பணிகளில் மாநகராட்சி நிர்வாகம் தீவிரமாக ஈடுபட்டு உள்ளதாக தெரிவிக்கப்பட்டுள்ளது.

வதோதரா மூதாட்டி உயிரிழப்புடன் சேர்த்து நாட்டில் எச்3என்2 வைரஸ் பாதிப்பால் உயிரிழந்தவர்களின் எண்ணிக்கை 3 ஆக அதிகரித்து உள்ளது. இதற்கு முன் கர்நாடகா மாநிலம் ஹசன் பகுதியைச் சேர்ந்த 85 வயதான ஹயர் கவுடா, கடந்த பிப்ரவரி 24 ஆம் தேதி உடல் நலக் கோளாறு காரணமாக மருத்துவமனையில் அனுமதிக்கப்பட்டார்.

அவருக்கு எச்3என்2 வைரஸ் பாதிப்பு கண்டறியப்பட்ட நிலையில், சிகிச்சை பலனின்றி அவர் பரிதாபமாக உயிரிழந்தார். அதேபோல் ஹரியானா மாநிலம் ஜிந்த் மாவட்டத்தை சேர்ந்த 56 வயது முதியவர், ரோட்டக்கில் உள்ள அரசு மருத்துவமனையில் காய்ச்சல் உள்ளிட்ட அறிகுறிகளுடன் அனுமதிக்கப்பட்டார்.

அவருக்கும் பரிசோதனை செய்யப்பட்ட போது வைரஸ் தொற்று கண்டறியப்பட்டது, தொடர் சிகிச்சையில் இருந்த அவரும் சிகிச்சை பலனின்றி கடந்த 10ஆம் தேதி உயிரிழந்தார்.

இதையும் படிங்க: மும்பை தீ விபத்து: ஆயிரம் குடிசைகள் தீயில் கருகி சேதம், குழந்தை பலி!