LIVE: தமிழக வெற்றிக் கழகம் கொடி, பாடல் அறிமுகம் விழா நேரலை - TVK party flag

சென்னை: தமிழக வெற்றிக் கழகத்தின் கொடி மற்றும் பாடல் ஆகியவற்றை அக்கட்சியின் தலைவர் விஜய் இன்று பனையூரில் உள்ள கட்சித் தலைமை அலுவலகத்தில் வெளியிடுகிறார். அதன் நேரலை காட்சிகள்..நடிகர் விஜய் கடந்த பிப்ரவரி மாதம் தமிழக வெற்றிக் கழகம் என்ற கட்சியைத் தொடங்கினார். இதற்காக டெல்லியில் உள்ள இந்திய தேர்தல் ஆணையத்தில் கட்சியின் பொதுச் செயலாளரான புஸ்ஸி ஆனந்த் கட்சியை பதிவு செய்தார். இதையடுத்து வெளியிடப்பட்ட அறிக்கையில் 2026 சட்டமன்றத் தேர்தல்தான் இலக்கு என்றும் விஜய் அறிவித்தார். இதைத் தொடர்ந்து, கட்சியில் 2 கோடி உறுப்பினர்களை சேர்ப்பதற்கான பணிகள் முழுவீச்சில் நடைபெற்று வருகிறது. இந்நிலையில், கடந்த 19-ஆம் தேதி(திங்கட்கிழமை) பனையூரில் உள்ள கட்சி அலுவலகத்தில் மஞ்சள் நிறம், நடுவில் விஜய் படம் இருப்பது போன்ற கொடியை ஏற்றி விஜய் ஒத்திகை பார்த்த வீடியோ வெளியாகியிருந்தது. அதனைத் தொடர்ந்து இன்று தனது கட்சிக் கொடியை அறிமுகம் செய்யும் விஜய் பாடலையும் வெளியிடுகிறார். இந்நிகழ்ச்சியில் கலந்துக்கொள்ள 300-க்கும் மேற்பட்ட முக்கிய நிர்வாகிகள் பங்கேற்றுள்ளனர்.